هەرێمی کوردستان دەتوانێت زیاتر لە 50 هەزار بەرمیل نەوت بۆ پێداویستیی ناوخۆ بەکاربهێنێت؟

ئاڤا نیوز

هەرێمی کوردستان 50 هەزار بەرمیلی ڕۆژانە بۆ پێداویستیی ناوخۆ بەکاردەهێنێت و جێگری بەڕێوەبەری سۆمۆ چۆنییەتی زیادبوونی ئەو بڕە نەوتە بۆ ئاڤا میدیا ئاشکرا دەکات.

چیرۆکی سەرەکی: بەرەبەیانی ڕۆژی شەممە، 27-9-2025، هەناردەكردنی نەوتی هەرێمی كوردستان بۆ بازاڕەكانی جیهان دەستیپێکردەوە، ئەمەش دوای ئەوەی ڕێککەوتنێکی سێقۆڵی لە نێوان حكومەتی هەرێمی كوردستان و حكومەتی فیدڕاڵ و كۆمپانیاكانی بەرهەمهێنانی نەوتی كوردستان واژۆ كرا، وا بڕیاریشە بە هانردەکردنەوەی نەوت تەواوی کێشەکانی دیکەی نێوان هەولێر و بەغدا چارەسەر بکرێن.

لێدوانی فەرمی: د. حەمدی شنگالی، جێگری بەڕێوەبەری کۆمپانیای سۆمۆ بە ئاڤای ڕاگەیاند: بەپێی کات بڕی هەناردەکردنی نەوتی هەرێمی کوردستان لەو بڕەی ئێستا هەیە زیاتر دەبێت، هەروەها بەپێی پێویستیی ناوخۆ هەرێمی کوردستان، حکومەت دەتوانێت زیاتر لە 50 هەزار بەرمیل وەربگرێت و بەکاری بهێنێت، هەروەها عێراق هیچ گرفتێک بۆ ئەوە دروست ناکات، چونکە ئەمە لەسەر بنەمای پێویستی پەسەند کراوە.

زانیاریی زیاتر: بە گوتەی د. حەمدی شنگالی، ئەگەر هێرش بکرێتە سەر کێلگە نەوتییەکانی هەرێمی کوردستان، ئەوا عێراق هیچ گرفتێک بۆ نەوتی کوردستان دروست ناکات، چونکە بەپێی ڕێککەوتنەکە دەبێت حاڵەتە نەخوازراوەکان بەهەند وەربگیرێن و مامەڵەی واقعیانەیان لەگەڵدا بکرێت.