260 هەزار مووچەخۆر لە "هەژماری من" تۆمارکراون

ئاڤا نیوز

کردنەوەی هەژماری بانکی بۆ مووچەخۆرانی هەرێمی کوردستان لە پڕۆژەی "هەژماری من" بەردەوامە، تاوەکو سەرەتای ئەم مانگە، ژمارەی ئەو فەرمانبەرانەی لە پڕۆژەکە تۆمارکراون گەیشتووەتە 260 هەزار فەرمانبەر.

بۆچی گرنگە: هەژماری من هەرزانترین کرێی پێشکەشکردنی خزمەتگوزاری بانکیی لەسەر ئاستی عێراق هەیە، تەنیا دوو هەزار و 500 دیناری عێراقی لە هەژمارەکە وەردەگرێت.

لێدوانی فەرمی: مەولود سابیر، بەڕێوەبەری گشتیی بانکە بازرگانییەکان بە ئاڤا نیوزی گوت: "خزمەتگوزارییەکی دیکەی  هەژماری من ئەوەیە، بانکەکان لە بری دابەشکردنی مووچە دەپڕژێنە سەر کاروبارەکانی دیکەی بانکی لەوانە پاڵپشتی پڕۆژەکان و بەشداریکردنیان لە وەبەرهێنان، بەمەش کەرتی بانک و وەبەرهێنان زیاتر دەبوژێتەوە."

وێنە گەورەکە: دوای تۆمارکردنی فەرمانبەران لە پارێزگای هەولێر، ماوەی مانگێکە پرۆسەکە لە سلێمانی دەستیپێکردووە، تا ئێستا 153 هەزار کارتی بانکیش دراوەتەوە فەرمانبەران.

ئەوەی پێویستە بیزانیت: تا ئێستا پێنج بانک کە لەلایەن بانکی ناوەندییەوە دانپێدانراون، لە پڕۆژەی هەژماری من بەشدارن و  بڕیارە تا کۆتایی ئەمساڵ هەزار ئامێری ATM لە سەرجەم پارێزگا، قەزا و ناحیەکانی کوردستان جێگیر بکرێت.