د. فازڵ نەبی: هیچ هیوایەک بۆ ناردنی مووچەی مانگەکانی 11 و 12ی ئەمساڵ نەماوە

ئاڤا نیوز

بریکاری پێشووتری وەزارەتی دارایی عێراق ڕایدەگەیەنێت، بەهۆی ئەوەی تەنیا سێ ڕۆژ بۆ کۆتاییهاتنی ساڵی دارایی لە عێراق ماوە، مووچەی هەردوو مانگی 11 و 12ی مووچەخۆرانی هەرێمی کوردستان نانێردرێت.

وێنە گەورەکە: لە کاتێکدا مووچەخۆرانی هەرێمی کوردستان هێشتا چاوەڕوانی مووچەی مانگی 10 دەکەن، پێویست بوو حکومەتی فیدراڵی مووچەی هەرسێ مانگی کۆتایی ساڵ خەرج بکات، بەڵام ئاماژەکان و نزیکبوونەوەی سەری ساڵ دەریدەخەن کە بەغدا مووچەی دوو مانگی کۆتایی ساڵ نانێرێت.

لێدوانی فەرمی: د. فازڵ نەبی، بریکاری پێشووتری وەزارەتی دارایی عێراق بە ئاڤا نیوزی ڕاگەیاند: "هیچ ئاماژە و هیوایەک نییە بۆ ناردنی مووچەی مانگەکانی 11 و 12؛ مەگەر موعجیزەیەک ڕووبدات یان گوشارێکی زۆر بخرێتە سەر حکومەتی عێراق بۆ ئەوەی لە ساڵی داهاتوودا بێتە خەرجکردن، کە ئەویش هێشتا دیار نییە بە چ میکانیزمێک دەبێت."

ناوبراو ڕوونیشی کردەوە، هەرێمی کوردستان هەموو پابەندییە داراییەکانی خۆی جێبەجێ کردووە، لەوانە ناردنی "لیستی مووچە و تەرازووی پێداچوونەوە" (میزان مراجەعە)، بۆیە لەسەر بەغدا پێویست بوو شایستەکان بنێرێت.

زانیاریی زیاتر: فازڵ نەبی ئاماژەی بەوەش دا، ئەگەر بەغدا ڕەزامەندی لەسەر خەرجکردنی ئەو دوو مووچەیە بدات، حکومەتی هەرێمی کوردستان داهاتی ناوخۆی هەردوو مانگەکە کە بڕەکەی 240 ملیار دینارە، ڕادەستی بەغدا دەکات.

ئەمەش بزانە: تەنیا سێ ڕۆژ بۆ کۆتاییهاتنی ساڵی دارایی لە عێراق ماوە. لەگەڵ تەواوبوونی ساڵدا، هەموو ژمێرە (حیسابات)ەکان دادەخرێن، ئەمەش وای کردووە گومان لەوە بکرێت ئایا عێراق دەتوانێت لەسەر بودجەی ساڵی نوێ مووچەی مانگەکانی کۆتایی ساڵی ڕابردوو خەرج بکات یان نا.

باکگراوند: ڕۆژی 18-11-2025، محەممەد شیاع سوودانی، سەرۆکوەزیرانی عێراق، لە دهۆک لەگەڵ مەسرور بارزانی، سەرۆکوەزیرانی هەرێمی کوردستان کۆبووەوە. لە کۆبوونەوەکەدا جەخت لە دابینکردنی مووچە و شایستە داراییەکان کرایەوە و سوودانی بەڵێنی دا کە مووچەکانی ئەمساڵ بەپێی ڕێککەوتنەکان خەرج دەکرێن، بەڵام ئێستا گومان لە جێبەجێکردنی ئەو بەڵێنە بۆ دوو مانگی کۆتایی ساڵ دەکرێت.