هەواڵگریی عێراق دەستگیرکردنی "10 تیرۆریست" ڕادەگەیێنێت

ئاڤا نیوز

 

بەڕێوەبەرایەتیی هەواڵگریی سەربازیی عێراق دەڵێت، لە چەند ئۆپەراسیۆنێکی ئەمنییدا لە ناوچە جیاوازەکانی وڵات، "10 تیرۆریست"یان دەستگیرکردووە و دوویان ئافرەت بوون.

 

وێنە گەورەکە: لەگەڵ بەردەوامی هەڵمەتی هێزەکانی وەزارەتی ناوخۆی عێراق بۆ کۆنتڕۆڵکردنی چەک و دەستگیرکردنی ئەوانەی بەتۆمەتی دروستکردنی کێشەی عەشایەری و کۆمەڵایەتی داواکراون، هێزەکانی وەزارەتی بەرگریی و فەرماندەی ئۆپەراسیۆنە هاوبەشەکانیش بەشێوەی ڕۆژانە داواکراوی پەیوەست بە داعش و ڕێکخراوە توندڕەوە قەدەغەکراوەکان دەستگیر دەکەن.

 

ڕاگەیێنراوی فەرمی: بەڕێوەبەرایەتیی هەواڵگریی سەربازی سەر بە سەرۆکایەتیی ئەرکانی سوپای عێراق بڵاوی کردەوە، لە چەند ئۆپەراسیۆنێکدا و دوای کۆکردنەوەی زانیاریی، "10 تیرۆریست" لەناوچە جیاوازەکانی وڵات دەستگیرکراون کە دوویان ئافرەت بوون، دەستگیرکراوەکانیش بەگوێرەی ماددەی چواری تیرۆر داواکراوبوون و فەرمانی دەستگیرکردنیان هەبووە.

 

ئاماژەی بەوەشکردووە، دەستگیرکراوەکان بەگوێرەی ڕێکارە بەرکارەکان ڕادەستی لایەنی پەیوەندیدار کراون.