وەزارەتی ناوخۆ: ئۆباڵی جێبەجێنەکردنی ڕێککەوتنی شنگال لە ئەستۆی هەندێ هێز و کەسایەتییە

ئاڤا نیوز

 

وەزارەتی ناوخۆ سەبارەت بە تێپەڕبوونی پێنج ساڵ بەسەر واژۆکردنی ڕێککەوتنی شنگال دەڵێت، هیچ کام لە تەوەرەکانی ئیداری و ئەمنی و بونیادنانەوە جێبەجێ نەکراون. هاوکات وەزارەتی ناوخۆی کوردستان ئۆباڵی هێشتنەوەی دۆخی ناوچەکە دەخاتە ئەستۆی "هەندێ هێز و کەسایەتی دەرەوەی دامەزراوە فەرمییەکان".

 

ڕاگەیێنراوی فەرمی: ئەمڕۆ پێنجشەممە 9-10-2025، وەزارەتی ناوخۆی حکومەتی هەرێمی کوردستان ڕاگەیێنراوێکی بڵاوکردەوە، تێیدا هاتووە، پێنج ساڵ تێپەڕ دەبێت بەسەر واژۆکردنی ڕێککەوتنی شنگال و هیچ کام لە تەوەرەکانی ئیداری و ئەمنی و بونیادنانەوە جێبەجێ نەکراون.

 

ئاماژە بەوەش کراوە، ئەو ڕێککەوتنە نەخشە ڕێگای ئاساییکردنەوەی دۆخی شنگالە بۆ دابینکردنی سەقامگیریی و ئۆقرەیی و گێرانەوەی متمانە بۆ ئاوارەکان تا بە ئازادی و سەربەرزی بگەڕێنەوە سەر زێدی باب و باپیرانیان، بۆیە جێبەجێکردنی کرایە بەشێک لە ڕێککەوتنی سیاسیی لایەنە پێکهێنەرەکانی حکومەتی ئێستا و بەرنامەی کاری وزاری حکومەتی فیدراڵ.

 

لەلایەکی دیکە: لە بەشێکی دیکەی ڕاگەیێنراوەکەدا هاتووە، هەردوو حکومەتی هەرێمی کوردستان و فیدراڵ هەوڵیانداوە تەوەرەکانی ڕێککەوتنەکە جێبەجێ بکەن، بەڵام هەندێ هێز و کەسایەتی دەرەوەی دامەزراوە فەرمییەکان کە خۆیان لە سەرووی یاسا و ڕێککەوتن و دامەزراوەکانی دەوڵەت دەبینن، بەربەستی سەرەکی بەردەم جێبەجێکردنن، ئەمەش بووەتە هۆکاری بەردەوامی نەهامەتی ئاوارەکان و بێئومێدی و کۆچکردنی ژمارەیەکی زۆریان بۆ دەرەوەی وڵات.

 

وەزارەتی ناوخۆ ڕوونی دەکاتەوە، حکومەتی هەرێمی کوردستان لە سەرەتاوە ئامادەبووە ئەرکی سەرشانی جێبەجێ بکات بۆ زەمینەسازیی گەڕانەوەی خوشک و برایانی ئێزدی و هاووڵاتیانی دیکەی ڕەسەن بۆ زێدی خۆیان، "بە نیگەرانییەوە لە بەردەوامی نەهامەتییەکانی ئاوارەکان دەڕوانین و ئۆباڵی هێشتنەوەی دۆخی ئەو ناوچەیە لەو بارە نائاساییە خراپە دەخەینە ئەستۆی ئەوانەی بە ئاشکرا ڕێگرن لە جێبەجێکردنی ڕێککەوتنی شنگال.

 

ئەوەی پێویستە بیزانیت: ڕێککەوتنی شنگال خۆی لە شەش خاڵی سەرەکی دەیبینێتەوە، کە بریتین لە: هەڵبژاردنی قایمقامی نوێ، حكومەتی فیدراڵی ئیدارەی پرسی ئەمنی دەكات، دامەزراندنی 2500 كەس لە خەڵكی شنگال و ئاوارەكانی و دروستكردنی هێزێكی نوێ، كۆتاییهێنان بە پەكەكە و هەموو ئەو گرووپانەی پەیوەندیان پێوەیەتی، هیچ كەسێكی سەر بە پەكەكە نابێت لەو هێزە ئەمنییە نوێیە دابمەزرێت و هەولێر و بەغدا هەماهەنگی بۆ ئاوەدانكردنەوەی شنگال و ئیدارەكردنی بكەن.

 

باکگراوند: ڕۆژی 9ی ئۆکتۆبەری 2020، ڕێككەوتنی شنگال لە نێوان حكومەتی عێراق و حكومەتی هەرێمی كوردستان واژۆ کرا، بەڵام تاوەکو ئێستا حکومەتی عێراق ڕێککەوتنەکەی جێبەجێ نەکردووە و هەنگاوی ڕژد و ئامادەکاری پێویستی نەکردووە بۆ جێبەجێکردنی ئەو ڕێککەوتنە کە ئامانج لێی ئاسایی کردنەوەی شنگال و ئاوەدانکردنەوەی سنوورەکەیە.