کێشە نێوخۆییەکانی کۆمەڵی دادگەری قووڵتر دەبنەوە

ئاڤا نیوز

كاندیدكردنەوەی عەبدولستار مەجید، زاوای عەلی باپیر بۆ هەڵبژاردن، ناكۆكییە نێوخۆییەكانی کۆمەڵی دادگەری دەگەیێنێتە لووتكە و پێشبینی دەكرێت کاریگەری لەسەر ژمارەی دەنگەکانی حیزبەکە هەبێت.

وێنە گەورەکە: هەرچەندە چەند ساڵێکە کۆمەڵی دادگەری کێشەی نێوخۆیی هەیە، بەڵام ئێستا هەردوو ئەندامی سەرکردایەتی، فەخرەدین قادر و دلێر گەرمیانی لەگەڵ چەند بەرپرسێکی دیکە ( كە بەگرووپی نەهزە دەناسرێن) لە شێوازی بڕیاردان و دابەشكردنی پۆستەكان لەناو حیزبەكەیان تووڕە و نیگەرانن.

زانیاریی تایبەت: ئاڤا نیوز زانیویەتی سەرچاوەی ناكۆكییەكان دەگەڕێتەوە بۆ عەبدولستار مەجید، ئەندامی ئەنجوومەنی باڵای کۆمەڵی دادگەری.

هۆکارە زانراوەکان: جارێکی دیکە عەبدولستار مەجید وەک سەرۆکی لیستی کۆمەڵ لە بازنەی هەولێر بەربژێر کراوە، داواکراوە دوای دەرچوونی بکشێتەوە و کورسییەکە بۆ کەسێکی دیکە چۆڵ بکات، بەڵام ناوبراو ڕەتی کردووەتەوە.

 

بۆچوونی بەرامبەر: "دانانی عەبدولستار مەجید وەک سەرۆکی لیست، بۆ ئەزموون و کاریگەری ئەو دەگەڕێتەوە لە پرۆسەی سیاسی. بێستوون حەمە ساڵح، بەرپرسی دەزگای هەڵبژاردنی کۆمەڵی دادگەری وای بە ئاڤا نیوز گوت.

کاریگەری و لێکەوتەکان: بەراورد بە دوایین هەڵبژاردنی پەرلەمانی عێراق، پێشبینی دەکرێت لەم هەڵبژاردنەدا كۆمەڵی دادگەری 40٪ ی دەنگەکانی لەدەستبدات و ژمارەی کورسییەکانی لە 9 کورسییەوە بۆ چوار بۆ پێنج کورسی داببەزێت.