ئاڤای خەڵک؛ ژمارەیەک هاووڵاتی هەولێر داوا دەکەن پارەی کارەبایان لێ وەربگیرێت

ئاڤا نیوز

ژمارەیەک ماڵی گەڕەکی فەرمانبەرانی هەولێر لە مانگی حەوتی ئەمساڵەوە کارەبایان بووەتە 24 کاتژمێری بەڵام تاوەکو ئێستا پسوولەی کارەبایان بۆ نەگەڕاوەتەوە، هەر بۆیە داوا دەکەن ئەو گرفتەیان بۆ چارەسە بکرێت. 

چیرۆکی سەرەکی: نزیکەی 100 ماڵی گەڕەکی فەرمانبەران لە هەولێر دەڵێن: لە مانگی حەوتی ئەمساڵەوە کارەبای گەڕەکەکەمان بووە بە 24 کاتژمێری، بەڵام ئەوە سێ مانگە کەس نەهاتووە پسوولەی کارەبامان بۆ بهێنێت، ئەترسین لەسەرمان کەڵەکەبێت و دواتر قورسبێت بیدەین.

لێدوانی فەرمی: تیمی پڕۆژەی ڕووناکی لەوبارەیەوە بە ئاڤای ڕاگەیاند: ئەو هاووڵاتییانە و دانیشتووانی شوێنەکانی دیکەش ئەگەر پسوولەی کارەبایان پێ نەگەیشتووە دەتوانن سەردانی ژووری فرۆشیاری وزە لە بەڕێوبەرایەتی گشتیی کارەبا بکەن بۆ ئەوەی پارەی کارەباکانیان بدەن.

- ئەم پڕۆسەیە تا ئەو کاتە بەردەووام دەبێت کە سیستمێکی پارەدانی ئەلیکترۆنی تایبەت دابین دەکرێت. 

- هاووڵاتییان دەتوانن لە ڕێگەی موبایلەکەی دەستیانەوە مانگانە پارەی کارەبا بدەن و پێویست ناکات پسوولەیان بۆ بێت.