شەرع: ئاوەدانکردنەوەی سووریا 600 بۆ 900 ملیار دۆلاری پێویستە

ئاڤا نیوز

ئەحمەد شەرع، سەرۆکی سووریا ڕایگەیاند، تێچووی ئاوەدانکردنەوەی سووریا 600 بۆ 900 ملیار دۆلاری پێویستە. شەرع داواش لە کۆمەڵگەی نێودەوڵەتی دەکات پاڵپشتی هەوڵی ئاوەدانکردنەوەی سووریا بکەن.

 

وێنە گەورەکە: لە ساڵی 2011 خەڵکی سووریا شۆرشییان دژی دەسەڵاتی بەشار ئەسەد دەستپێکرد، دواتر شەڕی نێوخۆ لەنێوان حکومەت و شۆرشگێرەکان بەرپا بوو و 14 ساڵی خایاند، بەشێکی زۆری شار و شارۆچەکەکان وێران بوون، ئەمە جیا لە ئاوارەبوونی ملیۆنان سووری بۆ ناوەوە و دەرەوەی سووریا. لە ئێستادا حکومەتی سووریا بە هاوکاریی چەندین وڵات هەوڵی ئاوەدانکردنەوەی شارەکان و بوژانەوەی ژێرخانی ئابووری دەدات.

 

لێدوانی فەرمی: شەرع لە چاوپێکەوتنێکدا لە بەرنامەی (60 خولەک)ی کەناڵی (سی بی ئێس نیوز)ی ئەمریکی ڕایگەیاند، سزا ئابوورییە نێودەوڵەتییەکان کە بەسەر سووریادا سەپێنراون، ڕێگرن لە هەوڵەکانی ئاوەدانکردنەوە.

 

هاوکات جەختیشی لەوە کردەوە، وڵاتەکەی کراوە دەبێت بۆ هاوبەشییە نێودەوڵەتییەکان کە ڕێز لە سەروەریی وڵاتەکەی بگرن. ئاماژەی بەوەشکرد، "سووریا شایەنی ئەوەیە لە ئارامی و ئاسایشدا بژی، ئەمەش لە بەرژەوەندیی ناوچەکە و جیهاندایە".

 

باکگراوند؛ لە 08-12-2024، گرووپە چەکدارەکانی ئۆپۆزیسیۆنی سووریا بە سەرۆکایەتیی ئەحمەد شەرع دەستیان بەسەر دیمەشقی پایتەخت و شارەکانی دیکەدا گرت و کۆتاییان بە 61 ساڵ حوکمڕانیی حیزبی بەعس هێنا.