کێشەی خەڵک؛ ژمارەیەک پۆلیسی بارەگا حیزبییەکان مانگانە بڕێک پارەیان لێدەبڕدرێت و نیگەرانن

ئاڤا نیوز

 

ژمارەیەک لە پۆلیسی پاسەوانی بارەگا حیزبییەکان لە سنووری گەرمیان، ناڕەزایەتی دەردەبڕن بەرامبەر بە بڕینی بڕی 61 هەزار دینار لە مووچە مانگانەکانیان.

بەدواداچوونی ئاڤا؛ ئاڤا زانیویەتی نزیکەی 900 پۆلیس کە ئەرکی پاسەوانیکردنی بارەگای هەموو حیزبەکانیان لە ئەستۆدایە، مانگانە و لە کاتی وەرگرتنی مووچەدا، بڕی 60 هەزار دیناریان بە شێوەیەکی ئاشکرا و یاسایی بۆ تێچووی نانخواردن لێ دەبڕدرێت. بەڵام جێگەی نیگەرانی ئەو پۆلیسانە ئەوەیە کە بڕی هەزار دیناری دیکەشیان لێ وەردەگیرێت بێ ئەوەی هۆکارەکەی بزانن و ئاگاداری ئەوە بن کە کێ ئەو بڕە پارەیە دەبات. بەمەش کۆی گشتی پارەی بڕڕاو لە هەر پۆلیسێک دەگاتە 61 هەزار دینار.

 

لێدوانی فەرمی؛ فازڵ حەمە ڕەحیم، بەرپرسی ڕاگەیاندنی پۆلیسی پاسەوانی بارەگاکان، لە لێدوانێکدا بۆ ئاڤا ڕایگەیاند، هۆکاری بڕینی ئەو هەزار دینارە لە ڕابردوودا بۆ دابینکردنی سووتەمەنی ئۆتۆمبێل و نانخواردنی ئەو ستافە بووە کە مووچە دابەش دەکەن. هەروەها ئاماژەی بەوەشکردووە کە هەندێک جار کێشەکە لە بانکەکانەوە سەرچاوە دەگرێت و ئەوان ئەو پارەیە بۆ دابینکردنی پێداویستییەکانیان دەبڕن.

 

فازڵ حەمە ڕەحیم جەختی لەوە کردەوە و وتی: "بەدواداچوونی ورد دەکەین و لەمەودوا نابێت یەک دیناری زیادەش لە مووچەی ئەو پۆلیسانە ببڕدرێت."