پەرلەمانی عێراق لیژنەیەک بۆ کوژرانی کاندیدەکەی پەرلەمان پێکدەهێنێت

ئاڤا نیوز

مەحموود مەشهەدانی، سەرۆکی پەرلەمانی عێراق، سەرەخۆشی و هاوخەمیی خۆی بۆ کوژرانی سەفا مەشهەدانی، کاندیدی پەرلەمانی عێراق دەربڕی، مەشهەدانی ڕایگەیاند، پەرلەمان لیژنەیەکی لێکۆڵینەوە لەوبارەیەوە پێکدەهێنێت.

 

وێنە گەورەکە: درەنگانێکی شەوی ڕابردوو سەفا حوسێن مەشهەدانی، ئەندامی ئەنجوومەنی پارێزگای بەغدا و کاندیدی  هاوپەیمانیی سیادە بۆ پەرلەمانی عێراق کوژرا، بەگوێرەی لێکۆڵینەوە سەرەتاییەکان لەڕێگەی بۆمبی چێنراوەوە ئۆتۆمبێلەکەی تەقێنراوەتەوە و بەهۆیەوە بووەتە هۆی گیانلەدەستدانی.

 

ڕاگەیێنراوی فەرمی: مەحموود مەشهەدانی لە ڕاگەیێنراوێکدا، داوای لە حکومەت و لایەنە ئەمنییە پەیوەندیدارەکان کرد، "ڕێوشوێن و لێکۆڵینەوەی پێویست بگرنەبەر و لیژنەیەک پێکبهێنن بۆ لێکۆڵینەوە لەم تاوانە قێزەونە، بۆ دەستنیشانکردنی تاوانباران و گەیاندنیان بە دادگا بۆ ئەوەی سزای شیاوی خۆیان وەربگرن".

 

دووپاتیشی کردەوە کە "پەرلەمانی عێراق لیژنەیەکی لێکۆڵینەوە پێکدەهێنێت بۆ لێکۆڵینەوە لە ڕووداوە تیرۆریستییەکە، کە کەسایەتییەکی نیشتمانی و کۆمەڵایەتی کردە ئامانج لەپێناو دادگاییکردنی هەموو ئەوانەی پەیوەندییان بەو کردەوەیە هەبووە".