بەهۆی بڵاوبوونەوەی ئەنفلۆنزا لە ئێران ڕێکارەکانی خۆپارێزی لە هەرێمی کوردستان تووندتر دەکرێن

ئاڤا نیوز

 

بەهۆی بڵاوبوونەوەی ئەنفلۆنزای باڵندە لە ئێران هاوردەکردنی هەموو جۆرە پەلەوەر و بەرووبوومی کێڵگە پەلەوەرییەکانی ئەو وڵاتە بۆ هەرێمی کوردستان قەدەغە کرا، هاوکات ڕێکارەکانی خۆپارێزیش بۆ بەرگرتن لە بڵاوبوونەوەی ئەو ئەنفۆنزایە لە کوردستان تووندتر دەکرێن.

 

لێدوانی فەرمی؛ فیراس سدیق، بەڕێوەبەری سامانی ئاژەڵ لە وەزارەتی كشتوكاڵی هەرێمی كوردستان بە ئاڤا میدیای گوت، تا ئێستا هیچ حاڵەتێکی ئەنفلۆنزای باڵندە لە هەرێمی کوردستان تۆمار نەکراوە، بەڵام وەک خۆپارێزی و ڕێگری کردن لە بڵاوبوونەوەی ئەو ڤایرۆسە، ڕێکارەکان توندتر کراون و بەردەوام چاودێریی بارودۆخەکە دەکەین.

 

فیراس سدیق ئاماژەی بۆ ئەوە کرد، بەهۆی بڵاوبوونەوەی ئەنفلۆنزای باڵندە لە وڵاتی ئێران، هاوردەکردنی هەموو جۆرە پەلەوەرێک و بەرووبوومی کێڵگە پەلەوەرییەکانی ئەو وڵاتە قەدەغە کرا، ئەو مۆڵەتانەشی پێشتر وەرگیرابوون ئێستا هەڵپەسێردراون.

 

لەلایەکی دیکە؛ سەبارەت بە سەرهەڵدانی ئەنفلۆنزای باڵندە لە پارێزگای نەینەوا، فیراس سدیق، گوتی دوێنێ لیژنەی باڵای ئەنفلۆنزای باڵندە کۆبوینەوە و بڕیار لە ژمارەیەک ڕێککار درا کە دەستبەجێ کاریان لەسەر دەکرێت، ئەوانیش بریتین لە؛ قەدەغەکردنی باڵندە و پەلەوەری زیندوو و بەرووبوومەکانیان وەک، پەلەوەر، هێلکەی تروکاندن، جوچکە لە نەینەوا و هەر پارێزگایەکی دیکە کە بە فەرمی نەخۆشی ئەنفلۆنزای تێدا ڕاگەیەنرابێت، لەهەمان کاتیش نابێت ئالیک و پەلەوەر و باڵندە هەناردەی ئەو ناوچە و پارێزگایانە بکرێت کە نەخۆشیەکەی تێدا بڵاوبووەتەوە.

 

ئەو بارهەڵگرانەی پەلەوەر و بەرووبوومی پەلەوەر بۆ ئەو ناوچانە دەگوازنەوە کە نەخۆشیەکەی تێدا بڵاوبووەتەوە یان گومان دەکرێت نەخۆشیەکەی تێدا بڵاوبوبێتەوە، دەبێت بارهەڵگرەکەی پیش گەڕانەوەی بۆ هەرێمی کوردستان لە بزاگەکان تەعقیم بکرێت.

 

ئەوەی پویستە بیزانیت: ئەو ڕێکارانەش کاتین تا کۆتایی هاتنی نەخۆشیەکە کاریان پێدەکرێت.

 

شێوازی جێبەجێ کردن؛ تایبەت بە ناوخۆی هەرێمی کوردستانیش پلانێکی پێشوەختە دانراوە، تیایدا ئەرکی فڕۆکەخانە و خاڵە سنوورییەکان، بەڕێوەبەرایەتییەکان و تاقیگەکانی ڤێرتەرنەری و پڕۆژە و کێڵگە پەلەوەرییەکان دیاری کراوە، بۆ خۆپاریزی و ڕێگری کردن لە بڵاوبوونەوەی ئەو نەخۆشییە لە هەرێمی کوردستان.