وادەی یەكەم گەشتی ئاسمانی نێوان سلێمانی و توركیا ئاشكرا دەكرێت

ئاڤا نیوز

بەپێی خشتەی گەشتەكانی هێڵی فڕۆكەوانیی توركیش ئێرلاین؛ ڕۆژی 3ـی مانگی داهاتوو گەشتە ئاسمانییەكانی نێوان توركیا و فڕۆكەخانەی نێودەوڵەتیی سلێمانی دەست پێدەكەنەوە.

چیرۆکی سەرەکی: دوای سەردانەكەی سەرۆكی هەرێمی كوردستان بۆ توركیا لە ڕۆژی 9ـی ئەم مانگە و كۆبوونەوەی لەگەڵ ڕه‌جه‌ب ته‌يب ئه‌ردۆغان، سه‌رۆككۆمارى توركيا، سەرۆکایەتیی هەرێمی کوردستان ڕایگەیاند، سوپاس و پێزانينمان بۆ ڕه‌جه‌ب ته‌يب ئه‌ردۆغان، سه‌رۆكى كۆمارى توركيا دووپات ده‌كه‌ينه‌وه‌ كه‌ له‌ كۆبوونه‌وه‌كه‌يدا له‌گه‌ڵ نێچيرڤان بارزانى، سه‌رۆكى هه‌رێمى كوردستان، فه‌رمانى دا گه‌شته‌ ئاسمانييه‌كانى هێڵى فڕۆكه‌وانيى توركيا بۆ سلێمانى ده‌ست پێبكه‌نه‌وه‌.

زانیاریی بەدەستهاتوو: هێڵی ئاسمانیی 'توركیش ئێرلاین' سیستمی فرۆشتنی تكتی گەشتی ئاسمانیی بۆ فڕۆكەخانەی نێودەوڵەتیی سلێمانی كارا كرد، یەكەم گەشتیش لەنێوان توركیا و سلێمانی لە ڕۆژی سێی مانگی داهاتوو دەبێت. 

ڕاگەیێنراوی فەرمی: لە ڕاگەیێنراوێکدا فڕۆکەخانەی نێودەوڵەتی سلێمانی دەڵێت، ئەمڕۆ چوارشەممە 15-10-2025، ده‌سه‌ڵاتی فڕۆکه‌وانی شارستانی تورکیا ئاگادارینامەی (NOTAM) لە سایتی جیهانی بڵاوکردنەوەی ئاگاداری نامە ئەلەکترۆنییەکانی (NOTAM) لابرد.

لەم ڕوانگەیەوە، ده‌سه‌ڵاتی فڕۆکه‌وانی شارستانی تورکیا گەشتە ئاسمانییەکان و ئاسمانی ووڵاتەکەی بەڕووی گەشتەکان بۆ فڕۆکەخانەی نێودەوڵەتی سلێمانی ئاسایی کردەوە.

لەلایەكی دیكەوە: کۆمپانیایێکی گەشتوگوزاری بۆ ئاڤا پشتڕاستی كردەوە و ڕایگەیاند ڕۆژی 3ـی 11، یەكەم گەشتی ئاسمانی لە فڕۆكەخانەی سلێمانییەوە بەرەو توركیا لەكاتژمێر 02:30 خولەکی شەو دەبێت و خەڵكێكی زۆریش لەئێستاوە تكتی داوا كردووە.

باکگراوند: تورکیا لە ڕۆژی 3ـی نیسانی 2023 بڕیاری ڕاگرتنی گەشتە ئاسمانییەکانی نێوان فڕۆکەخانەی سلێمانی و هەموو فڕۆکەخانەکانی تورکیای دەرکرد، ماوەی زیاتر لە 31 مانگە هیچ گەشتێك لەنێوان سلێمانی و توركیا ئەنجام نەدراوە.