لە كابینەی نۆیەمدا چوار سایلۆ بەگوژمەی 84 ملیار دینار دروستكراون

ئاڤا نیوز

کابینەی نۆیەمی حکومەتی هەرێمی کوردستان، لە ڕەخساندنی بازاڕ بۆ ساغکردنەوەی بەرهەمی جووتیاران هەنگاوی گەورەی ناوە؛ لەو ماوەیەدا چوار سایلۆی گەورە بە گوژمەی 84 ملیار دینار دروستكراون و پێنج سایلۆی دیكەش دروست دەكرێن.

چیرۆكی سەرەكی: حکومەتی هەرێمی کوردستان بەردەوامە لە بەهێزکردنی ئاسایشی خۆراک لەڕێگای جێبەجێكردنی سیاسەتی ساغكردنەوە و بەبازاڕكردنی گەنمی جووتیاران؛ لە ماوەی شەش ساڵدا، چوار سایلۆ دروستكراون كە تێكڕایان دەتوانن 160 هەزار تۆن گەنم كۆگا بكەن.

لێدوانی فەرمی: نەوزاد شێخ كامیل، بەڕێوەبەری گشتیی بازرگانی هەرێمی كوردستان بە ئاڤای ڕاگەیاند، لە ئاییندەیەكی نزیكدا پێنج سایلۆی نوێ لە دهۆک، زاخۆ، کفری، کۆیە و هەریر دروست دەکرێن كە سوودی گەورەی دەبێت لە ساغكردنەوە و بەبازاڕكردنی گەنمی جووتیاران.

پەیوەست بەم بابەتەوە: ئێستا لە هەرێمی كوردستان لەڕێگەی کارگە ناوخۆییەکانەوە، چەندین بەرهەمی جۆراوجۆر لە گەنمی بەرهەمهاتوو دروست دەکرێت، بەئامانجی ئەوەی پێداویستی ناوخۆیی پڕبكرێتەوە.