دهۆک دوو هەفتەی بانگەشەی هەڵبژاردنی بێ هیچ سەرپێچییەک بەڕێکردووە

ئاڤا نیوز

دوو هەفتەیە بانگەشەی هەڵبژاردنی شەشەمین خولی پەرلەمانی عێراق دەستی پێکردووە و لەسەر ئاستی هەرێمی کوردستان دهۆک تاکە پارێزگایە کە هیچ سەرپێچییەکی بانگەشەی تێدا تۆمار نەکراوە.

وێنە گەورەکە:  بڕیارە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، لەم هەڵبژاردنە 21 ملیۆن و 404 هەزار و 291 کەس مافی دەنگدانیان هەیە و حەوت هەزار و 768 کاندیدیش کێبڕکێ لەسەر 329 کورسییەکەی پەرلەمان دەکەن.

لێدوانی فەرمی: خالید عەباس، بەرپرسی ئۆفیسی دهۆکی کۆمسیۆنی باڵای سەربەخۆی هەڵبژاردنەکان بە ئاڤای ڕاگەیاند: لە ماوەی دوو هەفتەی بانگەشەی هەڵبژاردندا لە 3-10-2025 تاوەکوو 17-10-2025 هیچ سەرپێچییەکی بانگەشە تۆمار نەکراوە ئەمەش بەڵگەیە بۆ پابەندیی لایەنەکان بە ڕێنماییەکانی بانگەشەی هەڵبژاردن.

زانیاریی زیاتر: بەپێی زانیارییەکانی ئاڤا، لە ماوەی ئەم دوو هەفتەیەدا 38 سەرپێچی لە پارێزگای هەولێر تۆمار کراون و لەو ژمارەیەک بەشێک لە سەرپێچیکارەکان سزا دراون یەک سەرپێچیش لە پارێزگای سلێمانی تۆمار کراوە.

لەلایەکی دیکەوە: جومانە غەلای، وتەبێژی کۆمیسیۆنی هەڵبژاردنەکانی عێراق ڕایگەیاند، تا ڕۆژی سێشەممە ،14ـی تشرینی یەکەم، ئەنجوومەنی کۆمیسیارانی کۆمیسیۆن بڕیاری سزادان بە پێبژاردنی دارایی بەسەر 400 کاندیددا سەپاندووە، لەو ژمارەیەش 291ـیان لە ڕەگەزی نێر و 49ـی دیکەشیان لە ڕەگەزی مێ بوون. لەنێو ئەوانەی سزادراون 60 کاندیدیان لەسەر ئەوە سزادراون کە پێش وادەی فەرمی کۆمیسیۆن کە 3ـی ئەم مانگە بوو، دەستیان بە بانگەشەی هەڵبژاردنی پەرلەمانی عێراق کردبوو.