فینلەندا پێدانی مافی هاووڵاتیبوون تووندتر دەکات

ئاڤا نیوز

حکومەتی فینلەندا لەڕێگای پڕۆژەیاسایەک دەیەوێت مەرجەکانی بەدەستهێنانی ڕەگەزنامەی وڵاتەکەی تووندتر بکات.

چیرۆکی سەرەکی: پەرلەمانی فینلەندا بە 103 دەنگی بەڵێ، بەرامبەر بە 58 دەنگی نەخێر پڕۆژەیاسای حکومەتی بۆ هەموارکردنەوەی چەند بڕگەیەکی یاسای ڕەگەزنامە پەسەندکرد کە بە هۆیەوە پێدانی مافی ڕەگەزنامە تووندتر دەبێت.

زانیاریی زیاتر: بە گوێرەی هەموارەکە پێدانی ڕەگەزنامە مەرجدار دەکرێت بە چەند مەرجێکی وەک دەستپاکی و بوونی سەرچاوەی دارایی شایستە. هاوکات ئەنجامدانی تاوان کاریگەریی لەسەر بەڕێوەچوونی پڕۆسەی داواکاریی وەرگرتنی ڕەگەزنامە دەبێت. هەروەها لەم پڕۆسەیەدا بایەخێکی زۆر بە ڕەچاوکردنی ئاسایشی نیشتیمانی دەدرێت.

هەر بە گوێرەی هەموارەکە بەرپرسیارێتی و پابەندیی کەسەکان لە دوای وەرگرتنی ڕەگەزنامە زیاتر دەبێت. هەروەک چۆن ئەگەر کەسێک زانیاریی هەڵەی دابێت لە کاتی داواکردنی ڕەگەزنامە یان تاوانی لە دژ بەرژەوەندییە باڵاکانی فینلەندا ئەنجام دابێت، ئەوا ڕەگەزنامەکەی لەدەست دەدات.

ئەوەی پێویستە بیزانیت: فینلەندا ڕەگەزنامە لە ژمارەیەکی زۆر لەو کەسانە وەردەگرێتەوە کە دوو ڕەگەزنامەیان هەیە و بە ئەنجامدانی تاوانی تیرۆر، ناپاکی یان ناپاکیی گەورە تاوانبار کراون و لانیکەم دوو ساڵ سزا دراون، کە پێشتر پێنج ساڵ بوو.