ترەمپ و زێلینسکی کۆدەبنەوە

ئاڤا نیوز

بڕیارە کاتژمێر 8ـی ئەمشەو دۆناڵد ترەمپ، سەرۆکی ئەمریکا لەگەڵ ڤۆلۆدیمێر زێلینسکی، سەرۆکی ئۆکرانیا لە کۆشکی سپی کۆببنەوە و چاوەڕوان دەکرێت تەوەری سەرەکی کۆبوونەوەکەشیان پێدانی مووشەکی تۆماهۆکی ئەمریکا بێت بە ئۆکراینا.

وێنە گەورەکە: ئۆکرانیا چەندین جار داوای کردووە ئەمریکا مووشەکی تۆماهۆکی پێبدات تاوەکو ڕووسیا ناچار بە دانوستان و ڕاگرتنی جەنگ بکات، بەڵام تا ئێستا ئەمریکا بەم داواکارییەی ئۆکراینا ڕازی نەبووە.

لەلایەکی دیکەوە: ڕووسیا بەتووندی دژایەتی داواکارییەکەی ئۆکرانیای کردووە و بە ڕوونی ئەمریکای ئاگادارکردووەتەوە کە ئەم هەنگاوە کاریگەری نەرێنی دەکاتە سەر پەیوەندییەکانی نێوانیان.

ئەوەی پێویستە بیزانیت: مووشەكی تۆماهۆك، كە لەلایەن هێزی دەریایی ئەمریكا بۆ لێدانی بنكەكانی رێكخراوی داعش بەكارهێنرا، بە باشترین و كاریگەرترین مووشەكی ئەمریكی دادەندرێت و دەتواندرێت لە سەکۆی هەڵدانی مووشەکی یان لە ژێردەریاییەوە بهاوێژرێت و بە یارمەتی كەشتی ئاسمانی ئامانجەكان بپێكێت.