ترەمپ: پێدانی مووشەکی تۆماهۆک بە ئۆکرانیا دۆخەکە ئاڵۆزتر دەکات

ئاڤا نیوز

سەرۆکانی ئەمریکا و ئۆکرانیا لە کۆشکی سپی کۆبوونەوە و ترەمپ دەڵێت، دەمەوێت کۆتایی بە جەنگی نێوان ڕووسیا و ئۆکراینا بهێنم.

چیرۆکی سەرەکی: ڕۆژی هەینی لە کۆشکی سپی، دۆناڵد ترەمپ، سەرۆکی ئەمریکا پێشوازی لە ڤۆلۆدیمێر زێلینسکی، سەرۆکی ئۆکرانیا کرد و گفتوگۆیان لەبارەی کۆتاییهێنان بە جەنگی نێوان ڕووسیا و ئۆکرانیا کرد.

لێدوانە فەرمییەکان:

دۆناڵد ترەمپ، سەرۆکی ئەمریکا ڕایگەیاند، هەوڵ دەدەم کۆبوونەوەی سێقۆڵی بە بەشداری خۆم، پووتین و زێلینسکی ڕێکبخەم.

ترەمپ ئەمانەشی وت:

٠ پێم وایە پووتین دەیەوێت کۆتایی بە جەنگی ئۆکرانیا بهێنێت و لەو بارەیەوە قسەی لەگەڵ دەکەم.

٠ دۆخی ڕۆژهەڵاتی ناوەڕاست زۆر لە قەیرانی ئۆکرانیا قورستر بوو، بەڵام توانیمان چارەسەری بکەین.

٠ ئەمریکا پێویستی بە مووشەکی تۆماهۆکە و پێدانی مووشەکەکە بە ئۆکرانیا ئاسان نییە و هیوادارین پێویستی پێی نەبێت، چونکە مەترسیدارە و گرژییەکان زیاتر دەکات.

٠ درۆنی زیاتر دروست دەکەین و هەروەها لە وڵاتانی دیکەشی دەکڕین.

ڤۆلۆدیمێر زێلینسکی، سەرۆکی ئۆکراینا ڕایگەیاند، دەمانەوێت وەک ئەوەی لە ڕۆژهەڵاتی ناوەڕاست ڕوویدا جەنگ ڕابوەستێت و ئاشتی بەدی بێت، بەڵام پووتین نایەوێت.

زێلینسکی ئەمانەشی وت:

٠ سەرۆک ترەمپ توانای خۆی بۆ کۆتاییهێنان بە جەنگەکان نیشانی جیهاندا.

٠ پێویستمان بە مووشەکی تۆماهۆکە، چونکە لەگەڵ درۆنەکانمان باشتر دەتوانین ئۆپراسیۆنەکانمان ئەنجام بدەین.

٠ دەتوانین لەبەرامبەر مووشەکی تۆماهۆکدا بە هەزاران درۆن بدەینە ئەمریکا.

لەلایەکی دیکەوە: دوێنێ پێنجشەممە، دۆناڵد ترەمپ پەیوەندییەکی تەلەفۆنی لەگەڵ ڤلادیمێر پووتین، سەرۆکی ڕووسیا ئەنجامدا، دوای پەیوەندییەکە ترەمپ وتی گفتوگۆکانمان ئەرێنی و بەرهەمدار بوون.