بۆ جێبەجێکردنی ڕێککەوتننامەی غەززە نوێنەری سەرۆكی ئەمریكا سەردانی ڕۆژهەڵاتی ناوەڕاست دەکات

ئاڤا نیوز

بۆ ئەوەی لە نزیکەوە چاودێری جێبەجێکردنی ڕێککەوتنامەی غەززە و کارکردن لەسەر قۆناغەکانی داهاتوو بکرێت، سەرۆکی ئەمریکا نێردەکەی بۆ ڕۆژهەڵاتی ناوەڕاست دەنێرێت، سەرکردەیەکی حەماسیش دەڵێت:'' بزووتنەوەکە بە مەرجەکانی قۆناغی دووەمی ڕێککەوتنەکە ڕازی نەبووە''.

زانیاریی بەدەستهاتوو: بڕیارە سبەی یەکشەممە ستیڤ ویتکۆف، نێردەی دۆناڵد ترەمپ، سەرۆکی ئەمریکا بۆ ڕۆژهەڵاتی ناوەڕاست بەمەبەستی بەدواداچوون بۆ جێبەجێکردنی ڕێککەوتنی غەززە، گەشت بۆ ڕۆژهەڵاتی ناوەڕاست بکات، سەرچاوەیەکی ئاگادار بۆ ئەکسیۆس ئاشكرای کردووە، پێشبینی دەکرێت ویتکۆف سەردانی میسر و ئیسرائیل بکات.

کاریگەری و لێکەوتەکان: لەسەر پرسی گەڕاندنەوەی تەرمی ئیسرائیلییەکان حەماس ئاشکرای دەکات ئەم پرۆسەیە کاتی دەوێت، ئەمەش نیگەرانی بۆ لایەنی ئیسرائیلی دروست کردووە بەهۆی ئەوەی تەرمەکان وەرناگرێتەوە، پەیوەست بەم پرسە بەرپرسێکی ئەمریکی بۆ ئەکسیۆسی ئاشكرا کردووە ، بنیامین نەتانیاهۆ، سەرۆکوەزیرانی ئیسرائیل بە ترەمپی ڕاگەیاندووە کە حەماس 'درۆ 'دەکات و داوای لە ئەمریکا و ناوبژیوانانی دیکە کردووە فشار بخەنە سەر بزووتنەوەکە بۆ گەڕاندنەوەی تەرمی زیاتر، لە بەرامبەردا بەرپرسێکی ئیسرائیلی ئاماژەی بەوەدا کە ترەمپ بە نەتانیاهۆی وتووە کە ئاگاداری کێشەکەیە و کار بۆ چارەسەرکردنی کێشەکە دەکات.

ئەوەی لەبارەیەوە دەگوترێت: دەسەڵاتی پەخشی ئیسرائیل ڕایگەیاند، "سوپا و دەزگا ئەمنییەکانی ئیسرائیل پێشنیازی بەکارهێنانی ڕێگەی دیکە دەکات جگە لە شەڕ بۆ فشارخستنە سەر حەماس''.

لەلایەکی دیکەوە: سەبارەت بە جێبەجێکردنی قۆناغی دووەمی پلانی ئاشتی ترەمپ لە غەززە، محەمەد نەزال، سەرکردەیەکەی حەماس ڕایگەیاند، ''پرسی داماڵینی چەک ئاڵۆزە و لەم کاتەدا چارەسەر ناکرێت،بزووتنەوەکە بە مەرجەکانی قۆناغی دووەمی ڕێککەوتنەکە ڕازی نەبووە''، لە کاردانەوە لێدوانەکانی حەماس نووسینگەی نەتانیاهۆ، جەختی لەسەر داماڵینی چەک لە بزووتنەوەکە بەبێ مەرجی پێشوەختە کردەوە. ئاماژەی بەوەشکرد، حەماس دەبێت پابەندی پلانەکەی ترەمپ بێت.