براوەی خەڵاتی نۆبڵی ئاشتی پشتگیری ئیسرائیل دەکات

ئاڤا نیوز

ماریا ماچادۆ براوەی خەڵاتی نۆبڵی ئاشتیی لەگەڵ بنیامین نەتانیاهۆ، سەرۆکوەزیرانی ئیسرائیل قسە دەکات و پشتگیری خۆی بۆ وڵاتەکە دووپاتدەکاتەوە.

زانیاریی بەدەستهاتوو: نووسینگەی بنیامین نەتانیاهۆ، سەرۆکوەزیرانی ڕایگەیاند، ماریا کۆرینا ماچادۆ، سەرۆکی ئۆپۆزسیۆنی ڤەنزوێلا و براوەی خەڵاتی نۆبڵی ئاشتی لە میانەی پەیوەندییەکی تەلەفۆنیدا لەگەڵ نەتانیاهۆ، پشتیووانی خۆی بۆ ئیسرائیل دەربڕی، هاوکات "پێشوازی لە گەڕانەوەی بارمتە ئیسرائیلییەکان کرد و پێزانینی خۆی بۆ هەوڵەکانی ئیسرائیل لە دژی ئێران دەربڕی، تارانی بە هەڕەشە بۆ سەر هەردوو وڵات وەسف کرد''.

کاریگەری و لێکەوتەکان: ماچادۆ لە مێژە هەوڵی پتەوکردنی پەیوەندییەکانی لەگەڵ ئیسرائیل و نەتانیاهۆ دەدات، بە پێچەوانەی حکومەتی ئێستای ڤەنزوێلا کە پەیوەندییەکانی لەگەڵ ئێران و نەیارانی دیکەی ئیسرائیل دەپارێزێت.

زانیاریی زیاتر: نەتانیاهۆ کە ترەمپی بۆ ئەو خەڵاتە کاندید کردبوو، پیرۆزبایی لە ماچادۆ کرد بەبۆنەی بەدەستهێنانی خەڵاتی نۆبڵ و ستایشی هەوڵەکانی کرد بۆ بەرەوپێشبردنی دیموکراسی و ئاشتی.

باکگراوند: ماریا کۆرینا ماچادۆ،سەرۆکی ئۆپۆزسیۆنی ڤەنزوێلا کە بە ''خاتوونی ئاسنی ڤەنزوێلا'' ناسراوە، خەڵاتی نۆبڵی ئاشتی ساڵی2025ـی پێبەخشرا.