سەركردەیەكی بەرەی گەل: هەڕەشەمان لێدەکرێت

ئاڤا نیوز 

یەكێک لە سەرکردەکانی بەرەی گەل لە بەردەم بارەگای نەتەوەیەکگرتووەکان باسی لەوەکرد کە هەڕەشەیان لێکراوە و فشار خراوەتە سەر لایەنگرانیشیان تاوەکو بەشداریی بانگەشەی هەڵبژاردن نەکەن. 

چیرۆکی سەرەکی: پێشنیوەڕۆی ئەمڕۆ شەممە، بەشێک لە سەرکردە و ئەندامانی بەرەی گەل، لەبەردەم بارەگای نەتەوەیەکگرتووەکان لە شاری هەولێر گردبوونەوەیەکی ناڕەزایەتییان ئەنجامدا، بە ئامانجی فشار دروستکردن لەسەر دادگا و نوێنەرایەتیی وڵاتان لە کوردستان، بۆ ئازادکردنی لاهوور شێخ جەنگی و دەستگیرکراونی دیکەی حیزبەکەیان. 

لێدوانی فەرمی: ژینۆ محەممەد، یەکێک لە سەرکردەکانی بەرەی گەل، بە ئاڤا میدیای ڕاگەیاند: لە 22ـی ئاب کارەساتێکی گەورە بەسەر بەرەی گەلدا هات، لە سلێمانی دام و دەزگاکانی حکومەت و هێزە چەکدارەکان لەلایەن حزبەوە بەکارهێنران، داوا لە لایەنە پەیوەندیدارەکان دەکەین لێکۆڵینەوە لەسەر ئەم ڕووداوە بکەن، ناکرێت ڕێگا لە بیروڕایی ئازاد بگیرێت، سەرەڕای ئەمەش بە نهێنی هەڕەشەمان لێدەکرێت.

- لە هەڵمەتی هەڵبژاردن لە ڕێگەی پەیوەندی تەلەفۆنییەوە هەڕەشەمان لێدەکرێت. 

- فشار لەسەر لایەنگرانمان دروستکراوە کە نابێت بەشداریی لە هەڵمەتی هەڵبژاردن بکەن و هەڕەشەکانیش تەواو جددین. 

- تاوەکو ئێستا ژمارەی دەستگیرکراوانی لالەزار بە تەواوی نازانین، چونکە سەرجەم فەرماندەکانیش لەوێ دەستگیرکراون. 

- داواکارین حکومەت لەسەر داواکارییەکەمان هەڵوێستی هەبێت و دادگا ڕۆڵی یاسایی خۆی بگێڕێت.