ئیسرائیل: تاوەکو تەرمی بارمتەکان ڕادەست نەکرێن ڕێگەنادەین هاوکارییەکان بگەنە غەززە

ئاڤا نیوز

حکومەتی ئیسرائیل هۆشداری دەداتە بزووتنەوەی حەماس و دەڵێت، تاوەکو تەرمی بارمتەکان نەگەڕێندرێنەوە بۆ ئیسرائیل ڕێگە نادەن هاوکارییە مرۆییەکان بگەنە غەززە.

وێنە گەورەکە: ئیسرائیل داوا لە حەماس دەکات پابەندبێت بە بڕگەکانی ڕێککەوتنی غەززە و بزووتنەوەکەش دەڵێت، لە هەوڵەکانیان بۆ دۆزینەوەی تەرمی بارمتەکان بەردەوامن.

ڕاگەیێنراوی فەرمی: نووسینگەی سەرۆکوەزیرانی ئیسرائیل ڕایگەیاند، تا ئەو کاتەی حەماس بەڵێنەکانی بۆ گەڕاندنەوەی تەرمی سەربازە ڕفێنراوەکان جێبەجێ نەکات، دەروازەی ڕەفەح ناکرێتەوە. دەڵێت، بنیامین نەتانیاهۆ فەرمانی کردووە دەروازەی رەفەح نەکرێتەوە تا ئەو کاتەی ئاگادار دەکرێنەوە.

ئەوەی پێویستە بیزانیت: تائێستا تەرمی 10 بارمتەی ئیسرائیلی لەلایەن حەماسەوە گەڕێندراونەتەوە بۆ ئیسرائیل و 18 تەرمی دیکەش ماون کە حەماس ڕادەستیان بکاتەوە.