کچەکەی عەلی شەمخانی بە دەستووری ڕۆژئاوایی هاوسەرگیری دەکات

ئاڤا نیوز

هاوسەرگیری کچی عەلی شەمخانی، دەنگدانەوەیەکی فراوانی لە سۆشیاڵ میدیا بەدوای خۆیدا هێناوە و بە دەستووری ڕۆژئاوا و وڵاتانی ئەوروپا ناوزەندی دەکەن. 

چیرۆکی سەرەکی: بڵاوبوونەوەی گرتەیەکی ڤیدیۆیی ڕێوڕەسمی هاوسەرگیریی کچی عەلی شەمخانی، سکرتێری پێشووی ئەنجوومەنی باڵای ئاسایشی نیشتمانی و ئەندامی ئێستای ئەنجوومەنی بەرگریی کۆماری ئیسلامی، کاردانەوەی فراوانی لە تۆڕە کۆمەڵایەتییەکاندا دروستکرد و ڕوبەڕووی ڕەخنەی زۆر بووەوە.

زانیاریی زیاتر: کچەکەی عەلی شەمخانی، شەوی ڕابردوو ئاهەنگی هاوسەرگیری هەبوو، ڤیدیۆی هاوسەرگیرییەکەی بە خێرایی لە سۆشیاڵ میدیا بڵاوبووەوە و لە هەمانکاتدا کاردانەوەی جیاوازی لێکەوتووە، هاووڵاتییانی ئێران بە هاوسەرگیرییەکی دەستووری ڕۆژئاوای و ئەوروپی ناوزەندییان کردووە. 

- بەشێكی بەرچاوی کاردانەوەکانیش پەیوەندی بە شێوازی ئاهەنگگێڕانەکەوە هەیە لەوانە؛- ئەو دیمەنەی کە عەلی شەمخانی وەک باوکی بووک دەستی کچەکەی دەگرێت و دەچێتە ناو هۆڵەکەوە، هاووڵاتییانی ئێرانی دەڵێن، ئەمە تەنیا لە ئەوروپا هەیە، لەکاتێکدا کۆماری ئیسلامی ئێران هەمووکات خۆی بەدوور گرتووە لە دووبارەکردنەوەی کولتووری ڕۆژئاوایی. 

- بەشێکی دیکەش لە هاووڵاتییان دەڵێن؛ بەرپرسانی ئێران خۆیان پابەندی یاسا و دەستووری وڵات نابن و کەسوکاریان بە جلوبەرگی نیمچە ڕووتەوە هاوسەرگیری دەکەن و حیجاب ناکەن، کاتێکیش خەڵک پابەندی ئەو بڕیارەی دەوڵەت نابێت دەستگیر دەکرێت و شوێنی دەرکەوتنەکەشیان دادەخرێت.