سوپای ئیسرائیل هۆشداری بەپەلە دەداتە دانیشتووانی غەززە

ئاڤا نیوز

سوپای ئیسرائیل هۆشدارییەکی بەپەلەی ئاراستەی دانیشتووانی کەرتی غەززە کرد، بەتایبەتی ئەو ناوچانەی بە سوور دیاریکراون لە ڕۆژئاوای هێڵی زەرد، کە بە 'ناوچەی شەڕی زۆر مەترسیدار' ناوی بردووە.

وێنە گەورەکە: سەرەڕای ئاگربەست لە غەززە، پێکدادان لەنێوان هێزەکانی سوپای ئیسرائیل و چەکدارانی بزووتنەوەی حەماس لە کەرتەکە بەردەوامە و هەردوولا یەکتر بە پێشێلکردنی ئاگربەست تۆمەتبار دەکەن، ئەمجارەش سوپاس ئیسرائیل دەڵێت، ئەم هۆشدارییەیان دوای پێشێلکارییە بەردەوامەکانی ئاگربەست و هێرشە تیرۆریستییەکانی حەماسە.

ڕاگەیێنراوی فەرمی: ئەمڕۆ یەکشەممە 19-10-2025، سوپای ئیسرائیل لە ڕاگەیێنراوێکدا ئاماژە بۆ ئەوە دەکات، دوای پێشێلکارییەکانی ئاگربەست و هێرشە تیرۆریستییەکانی حەماس، داوا لە دانیشتووانی ناوچە سوورەکانی غەززە دەکەین کە لەسەر نەخشەکە دیاریکراون، دەستبەجێ بەرەو ڕۆژئاوا بچن و ناوچەکە چۆڵ بکەن.

سوپای ئیسرائیل ڕایگەیاند، بە هێزێکی زۆرەوە هێرش دەکاتە سەر ژێرخانی "تیرۆریستان" و چەکدارانی حەماس. جەختی لەوە کردەوە کە ناوچە سوورەکان "مەترسیدارن" و داوای لە دانیشتووان کرد تەنیا لەو لایەی هێڵی زەرد کە ڕووی لە ڕۆژئاوا بێت بمێننەوە، ئەمەش بۆ پاراستنی سەلامەتییانە لە هێرشەکانی داهاتوو.