ڕوانگەیەکی ژینگەیی هۆشداری دەدات: 70%ـی خاکی عێراق تا ساڵی 2026 دەبێتە ناوچەی مردوو

ئاڤا نیوز

ڕوانگەی "عێراقی سەوز"ـی تایبەتمەند بە کاروباری ژینگە، هۆشداری تووند لە خراپبوونی دۆخی ژینگەیی و کشتوکاڵی لە وڵات دەدات، بەهۆی وشکەساڵی و بەبیابانبوون، بەپێی خەمڵاندنە فەرمییەکان 60%ـی زەوییەکانی عێراق بە کەڵکی بەکارهێنان نەماون.

وێنە گەورەکە: بەپێی ڕاپۆرتەکانی نەتەوەیەکگرتووەکان، عێراق یەکێکە لەو پێنج وڵاتەی جیهان کە زۆرترین کاریگەری گۆڕانکاری کەشوهەوای لەسەرە، لە سەرەتای ساڵی 2025یش، سەنتەری ستراتیژی بۆ مافەکانی مرۆڤ ڕایگەیاندبوو، عێراق نزیکەی 30%ـی زەوییە کشتوکاڵییەکانی لەدەستداوە.

لێدوانی فەرمی: عومەر عەبدولـلەتیف، ئەندامی ڕوانگەکە، بە میدیای عێراقی ڕاگەیاند، نزیکەی 60%ـی زەوییەکانی عێراق بەهۆی وشکەساڵی و بەبیابانبوونەوە بە کەڵکی بەکارهێنان نەماون. ئەو ئاماژەی بەوەدا کە "ڕێژەی زەوییە وشکەکان و بیابانییەکان 60%ـی کۆی گشتی زەوییەکانی عێراق پێکدەهێنێت و ئەم ڕێژەیە لە بەرزبوونەوەدایە، ڕەنگە لە ساڵی داهاتوودا بگاتە 70%، ئەگەر ڕێکاری خێرا نەگیرێتەبەر".

لەهەمان کاتدا: بە گوتەی عەبدوللـەتیف، "چارەسەری کردەیی لەسەر زەوی تا ئێستا بوونی نییە، ئەمەش کارەساتە ژینگەییەکان قووڵتر دەکاتەوە و ڕووبەری زەوییە ناشیاوەکان بۆ کشتوکاڵ فراوانتر دەکات." بەپێی دوایین ئاماری وەزارەتی پلاندانان، بەبیابانبوون لە عێراق گەیشتووەتە 60%.

ئەوەی لەبارەیەوە دەگوترێت: پێشتر لە مانگی نیسانی ڕابردوو، وسام خەلەف عوبەید، سەرۆکی دەستەی گشتی بەنداو و پڕۆژە ئاوییەکان لە وەزارەتی سەرچاوە ئاوییەکان ڕایگەیاندبوو "ئاستی ئاو لە بەنداوەکانی عێراق کەمە، بەڵام ئاوی خواردنەوە و پێداویستییە سەرەکییەکان بۆ ئەم وەرزە و وەرزی داهاتوو بە تەواوی دابینکراوە."

ئەوەی پێویستە بیزانیت: عێراق ساڵانە 100 هەزار دۆنم بەهۆی بەبیابانبوونەوە لەدەست دەدات، هەروەها قەیرانی ئاو بووەتە هۆی کەمبوونەوەی ڕووبەری زەوییە کشتوکاڵییەکان بۆ 50%، بەپێی لێدوانە فەرمییەکان.

ئەمەش بزانە: بەگوێرەی خەمڵاندنەکانی ڕێکخراوی خۆراک و کشتوکاڵ "فاو"ـی سەر بە نەتەوەیەکگرتووەکان، ڕووبەری دارستانەکان لە عێراقدا تەنیا 8 هەزار و 250 کیلۆمەتر چوارگۆشە پێکدەهێنێت، واتە بە ڕێژەی 2%ـی کۆی گشتیی ڕووبەری وڵات.