لە هەرێمی کوردستان سەنتەری ئۆتیزم بۆ منداڵانی سەرووی تەمەن 12 ساڵان دەکرێتەوە

ئاڤا نیوز

وەزارەتی کار و کاروباری کۆمەڵایەتیی بە هاوکاری ڕێکخراوێکی ئەڵمانیا لە پارێزگاکانی هەرێمی کوردستان سەنتەری شەبەنگی ئۆتیزم بۆ منداڵانی سەرووی تەمەن 12 ساڵان دەکاتەوە.

چیرۆکی سەرەکی: ئەمڕۆ یەکشەممە 19-10-2025، وەزیری کار و کاروباری کۆمەڵایەتی لە دیوانی وەزارەت پێشوازی لە شاندێکی ئەڵمانی بە سەرۆکایەتیی ماریا کامینسکی، سەرۆکی یەکگرتووی ئەڵمانی بۆ شەبەنگی ئۆتیزم کرد.

لێدوانی فەرمی: کوێستان محەممەد، وەزیری کار و کاروباری کۆمەڵایەتیی حکومەتی هەرێمی کوردستان بە ئاڤا میدیای ڕاگەیاند، سەرۆکی ڕێکخراوی یەکگرتووی ئەڵمانی بۆ شەبەنگی ئۆتیزم لەسەر داوای خۆیان، لە هەرێمی کوردستان هاوکار دەبن بۆ ڕاهێنانی پیشەیی بە منداڵانی سەرووی تەمەن 12 ساڵان کە ئۆتیزمیان هەیە، بەڵام دەبێت شوێنیان بۆ دابین بکرێت.

وەزیری کار و کاروباری کۆمەڵایەتی وتیشی، "دوای ئەوەی لەگەڵ بەڕێوەبەری گشتیی دەستەبەری کۆمەڵایەتی کۆبووینەوە، بڕیارماندا لە سەنتەرەکانی ڕاهێنانی پیشەیی شوێن دابین بکەین، هەروەها لە سەنتەری ڕاهێنانی ڕاهێنەرانی هەولێر دەتوانین وەرشەیەک دابین بکەین. هاوکات لە کاتی بەڕێوەچوونی خول بۆ منداڵانی ئۆتیزم، دەتوانین بەشێوەی کاتی وەرشەیان دابین بکەین".

باس لەوەش دەکات، "لە سەنتەری ئۆتیزمی سلێمانی لە قاتی سەرەوە باڵەخانەیەکمان دروست کردووە کە 280 ملیۆن دیناری تێچووە، دەمانەوێت بۆ یەکەمجار وەکو ئەزموونێکی تاقیکاری، منداڵانی 12 بۆ 18 ساڵان وەربگرین، ئەگەر سەرکەوتوو بووین، ئەم ئەزموونە بۆ هەولێر و شارەکانی دیکەش دەگوازینەوە".

زانیاریی زیاتر: هەفتەی داهاتوو وەزارەتی کار و کاروباری کۆمەڵایەتی لەگەڵ ڕێکخراوی یەکگرتووی ئەڵمانی بۆ شەبەنگی ئۆتیزم یاداشتێک بۆ کردنەوەی سەنتەری پیشەیی بۆ منداڵانی شەبەنگی ئۆتیزمی سەرووی تەمەن 12 ساڵان  لە پارێزگاکانی هەرێمی کوردستان واژۆ دەکات.

ئەمەش بزانە: لە هەرێمی کوردستان لە سەنتەرەکانی ئۆتیزم ئەو منداڵانەی کە ئۆتیزمیان هەیە تاوەکو تەمەنی 12 ساڵان وەردەگیرێن، بەپێی ڕێنمایی ناتوانرێت منداڵانی سەرووی ئەو تەمەنە وەربگیرێن.