خشڵی شانشینی فەرەنسا و ئەڵماسەکانی ناپلیۆن لە مۆزەخانەی لۆڤەر دەدزرێن

ئاڤا نیوز

لە ڕووداوێکی شۆککەردا، گرووپێکی چوار کەسی نەناسراو توانیان دەست بەسەر چەندین خشڵی گرانبەهای شانشینی فەرەنسا و ملوانکە ئەڵماس و زومڕوتەکانی هاوسەرەکەی ناپلیۆن پۆناپارتدا بگرن لە مۆزەخانەی بەناوبانگی لۆڤەر لە پاریس.

چیرۆکی سەرەکی: ڕۆژی یەکشەممە تەنیا نیو کاتژمێر دوای کردنەوەی مۆزەخانەی لۆڤەر، لە کاتژمێر 9:30 بەیانی، تۆڕێکی دزی کە لە چوار کەس پێکهاتبوون و دەموچاویان بە تەواوی داپۆشیبوو، بە بەکارهێنانی پەیژەی کارەبایی لە ڕووباری سینـەوە سەرکەوتن بەسەر باڵەخانەی مۆزەخانەکەدا. ماوەی دزیکردنەکە نزیکەی حەوت خولەکی خایاندووە و دزەکان دواتر بە ماتۆڕسکیل لە ناوچەکە هەڵاتوون.

زانیاریی بەدەستهاتوو: وەزارەتی کولتووری فەرەنسا ڕایگەیاندووە کە هەشت خشڵی شانشینی فەرەنسا دزراون و بەهایان ناپێورێت. لەنێو لیستی خشڵە دزراوەکاندا ملوانکەیەک هەیە کە ناپلیۆن پۆناپارت پێشکەشی هاوسەرەکەی کردووە و نزیکەی دوو هەزار پارچە ئەڵماسی تێدا بەکارهێندراوە.

زانیاریی زیاتر: لە کاتی هەڵاتندا، دزەکان هەزار و 354 پارچە ئەڵماس و 56 زومڕوتیان لە تاجی شاژنێک لێ کەوتووە. بە گشتی، دزەکان دوو تاج، دوو ملوانکە، دوو جووت گوارە و دوو خشڵی سەر سنگی شاژنەکانی فەرەنسایان دزیووە.

لایەنە پەیوەندیدارەکانی فەرەنسا ئاماژە بەوە دەدەن کە دزییەکە پلانی وردی بۆ دانراوە و پێدەچێت تۆڕێکی دزیی نێودەوڵەتی لە پشتەوە بێت. لیژنەیەکی تایبەتی 60 کەسی بۆ لێکۆڵینەوە لە قۆناغەکانی ئامادەکاری بۆ دزییەکە، ئەو شوێنانەی دزەکان بەکاریان هێناون و ئەگەری هاوکاریکردنی کەسانێک بۆ دزییەکە پێکهێنراوە، بەو پێیەی دزەکان پێشتر زانیارییان لەبارەی ڕۆتینیاتی ئەمنی ناو مۆزەخانەکە هەبووە. گەورە بەرپرسانی وڵاتەکە جەخت لەوە دەکەنەوە کە دزەکان دەستگیر دەکرێن و خشڵەکان دەگەڕێنرێنەوە بۆ مۆزەخانەکە.

کاردانەوەکان: ئەم دزییە کاردانەوەی زۆری لە ناوخۆی فەرەنسا لێکەوتووەتەوە و حکومەت تۆمەتبار دەکرێت بەوەی بەهۆی کەمکردنەوەی پاسەوانەکانی مۆزەخانەکە، کەمتەرخەم بووە لە پاراستنی.

ئەوەی پێویستە بیزانیت: مۆزەخانەی لۆڤەر یەکێکە لەو مۆزەخانانەی زۆرترین گەشتیار لە جیهانەوە ڕووی تێ دەکەن، تەنیا ساڵی ڕابردوو هەشت ملیۆن و 700 هەزار کەس سەردانیان کردووە و چەندین تابلۆی جیهانی دەگمەنی وەک تابلۆی مۆنالیزا تێیدا نمایشکراوە.

باکگراوند: بەناوبانگترین دزیش لە ساڵی 1911 بوو کاتێک تابلۆی مۆنالیزا دزرا.