ترەمپ هەڕەشەی بڵاوەپێکردنی سوپا لە شاری سان فرانسیسکۆ دەکات

ئاڤا نیوز

دۆناڵد ترەمپ، سەرۆکی ویلایەتە یەکگرتووەکانی ئەمریکا، لە چاوپێکەوتنێکدا هەڕەشەی ناردنی هێزی سەربازی بۆ سان فرانسیسکۆی ویلایەتی کالیفۆرنیای کرد.

وێنە گەورەکە: ترەمپ چەندین جار قەبارەی تاوان و نائارامییەکانی شارەکانی ئەمریکا گەورە کردووە بۆ ئەوەی پاساو بۆ جێگیرکردنی هێزەکان بهێنێتەوە، ناوبراو پاسەوانی نیشتمانی لە لۆس ئەنجلۆس و واشنتن و مەمفیس جێگیر کردووە، ئەمەش ناڕەزایەتیی حکومەتی خۆجێی ئەو ویلایەتانەی بەدوای خۆیدا هێنا. لە کاتێکدا دادوەرەکان ڕێگرییان لە بڵاوەپێکردن و جێگیرکردنی لە شیکاگۆ و پۆرتلاند کرد.

لێدوانی فەرمی: سەرۆکی ئەمریکا بۆ کەناڵی "فۆکس نیوز" قسەی کردووە و ڕایگەیاند: سان فرانسیسکۆ یەکێک بوو لە باشترین شارەکانی جیهان. بەڵام 15 ساڵ لەمەوبەر شتەکان بەرەو خراپی ڕۆیشتوون، دەچینە سان فرانسیسکۆ و گەورەی دەکەینەوە".

زانیاریی زیاتر: ترەمپ لە مانگی حوزەیرانی ڕابردوودا، هەزاران پاسەوانی نیشتمانی و هێزی دەریایی ڕەوانەی لۆس ئەنجلۆس کرد بۆ ئەوەی هاوکاری پۆلیس بکەن لە هەڵمەتەکەیاندا بۆ کۆنترۆڵکردنی ناڕەزایەتی و نائارامییەکان کە بەهۆی سەرکوتکردنی کۆچبەری نایاساییەوە سەریهەڵدابوو.

ئەمەش بزانە: سان فرانسیسکۆ ڕووبەڕووی چەندین کێشە بووەتەوە، بەتایبەتی زیادبوونی ژمارەی بێ ماڵ و حاڵ و ئالوودەبووانی ماددە هۆشبەرەکان و تاوانەکان.