ئاڤای خەڵک؛ ئاڤا به‌دواداچوون بۆ ده‌ستبه‌كاربوونی سه‌ربازانی هێزه‌ هاوبه‌شه‌كه‌ ده‌كات

ئاڤا نیوز

ئاڤا میدیا بەدواداچوون بۆ گرفتی 442 کەس دەکات کە ناویان بۆ هێزە هاوبەشەکەی نێوان وەزارەتی پێشمەرگە و سوپای عێراق دەرچووە، کەچی تاوەکو ئێستا نەچوونەتە سەر ئەرکەکانیان.

وێنە گەورەکە: لە پێناو پڕکردنەوەی ئەو بۆشاییە ئەمنییەی لە نێوان حکومەتی عێراق و هەرێمی کوردستان هەیە، بەردەوام گفتوگۆ لە نێوان هەردوولادا کراوە تاوەکو بە هێزی هاوبەش پڕبکرێنەوە و ڕێگری لە هەر جووڵە و حاڵەتێکی نەخوازراوی چەکداری بکەن، بە تایبەت جووڵەکانی داعش لە ناوچەکانی خانەقین تاوەکو چیای قەرەچووخ لە قەزای مەخموور و چەند ناوچەیەکی دیکە.

چیرۆکی سەرەکی: لە مانگی تەممووزی ساڵی ڕابردوو، 442 کەس کە لە جێگەدانانیان بۆ کراوە، ناوەکانیان لەلایەن وەزارەتی پێشمەرگەوە بڵاوکراتەوە تاوەکو بڕۆنە بنکەی مەشقی کرکوش لە پاریزگای دیالە، پشکنین و ئیختبار بکەن بە مەبەستی دامەزراندن و گواستنەوەیان بۆ سەر ڕاژەی لیوای 20ـی هاوبەشی نێوان وەزارەتی پێشمەرگە و سوپای عیراق، ئەو کەسانە بایۆمەتریان کردووە و کارتەکانی دەنگدانیان بووەتە تایبەت، تەنانەت لە دەنگدانی ڕابردوو وەک دەنگدەری تایبەت دەنگیان داوە، کەچی تاوەکو ئێستا نەچوونەتە سەر ئەرکەکانیان، داوا لە ئاڤا میدیا دەکەن بەدواداچوونیان بۆ بکات و کێشەکەیان بۆ چارەسەر بکرێت. 

لێدوانی فەرمی: مەریوان قەرەنی، ئەندامی لیژنەی ئاسایش و بەرگریی پەرلەمانی عێراق بە ئاڤای گوت: لەگەڵ وەزارەتی بەرگریی عێراق و سەرۆکی ئەرکانی سوپای عێراق بە بەردەوامی لەسەر هێڵین، کار بۆ چارەسەرکردنی کێشەی ئەو 442 کەسە دەکەین و هەموو هەولێکیان بۆ دەدەین تاوەکو بخرێنە سەر ئەرکەکانیان.