سەفین دزەیی: داوامان لە یەکێتی ئەورووپا کردووە ڕۆڵیان هەبێت لە چارەسەرکردنی کێشەکانی نێوان هەولێر و بەغدا

ئاڤا نیوز

شاندی هاوبەشی هەرێمی کوردستان و عێراق بۆ کۆمەڵێک پرس لەگەڵ یەکێتی ئەورووپا کۆبووەوە. سەفین دزەیی دەڵێت، داوامان کردووە، یەکێتی ئەورووپا ڕۆڵی هەبێت لە ڕێگەیەکی گونجاو بۆ چارەسەرکردنی کێشەکانی نێوان هەولێر و بەغدا.

چیرۆکی سەرەکی: شاندێکی باڵای هەرێمی کوردستان هاوشان لەگەڵ شاندی باڵای عێراق لەگەڵ ئەندامانی یەکێتی ئەورووپا کۆبوونەوە و کۆمەڵێک تەوەر لە بوارەکانی وزە، ئابووری، سیستەمی بانکی و کەرتی تایبەت، دیموکراسییەت و مافی مرۆڤ و مافی ئافرەت، هەروەها ئاسایش و پرۆسەی دیموکراسی و هەڵبژاردن تاوتوێکران.

لێدوانی فەرمی: سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان تایبەت بە ئاڤا میدیا وتی، لە کۆبوونەوەکەدا بە گشتیی کۆمەڵێک تەوەر لە بوارەكانی وزە، ئابووری، سیستەمی بانکی، کەرتی تایبەت، دیموکراسییەت و مافی مرۆڤ و مافی ئافرەتان، ئاسایش، پرۆسەی دیموکراسی و هەڵبژاردن باسکران.

باسی لەوەش کرد، ماوە ماوە لە ئاستی باڵا دانیشتن لە نێوان عێراق و یەکێتی ئەورووپا دەبێت، بۆ ئەوەی پێداچوونەوە بەو بوارانە بکرێت کە جێبەجێ کراوە و ئەو گرفتانەش چین کە ڕێگرن لەبەردەم جێبەجێکردنیان. هاوکات باس لەوەکراوە کە عێراق چۆن ڕووبەڕوویان دەبێتەوە و یەکێتی ئەورووپا چۆن هاوکاری دەکات.

سەفین دزەیی دەڵێت، "ئەو کۆبوونەوەیە بۆ ئێمەی شاندی هەرێمی کوردستان دەرفەتێکی باش بوو، بۆئەوەی باس لە کۆمەڵێک پرس بکەین، بە تایبەت بابەتی بە قاچاغبردن و بازرگانیکردن بە مرۆڤ، پرسی ماددە هۆشبەرەکان کە مەترسیدارن لەسەر کۆمەڵگە".

هاوکات، "داوامان کرد ئەو گرفتانەی تا ئێستا لەنێوان هەولێر و بەغدا ماون، یەکێتی ئەوروپا ڕۆڵی هەبێت لە پاڵپشتیکردنی دیالۆگ لەنێوان هەرێمی کوردستان و عێراق کە بە ڕێگەیەکی گونجاو چارەسەر بکرێن".

زانیاریی زیاتر: لە کۆبوونەوەکە باس لە فرەچەشنکردنی ئابووریی کوردستان و بەرەوپێشبردنی بوارەکانی کشتوکاڵ و ژێرخانی ئابووری و ئەو ڕیفۆرمانەی کە ئیدارەی کراوە، کرا،  وەکو پرۆژەكانی ڕووناکی و هەژماری من.

ئەوەی پێویستە بیزانیت: عێراق و یەکێتی ئەورووپا لە ساڵی 2012ەوە ڕێکەوتنێک لەنێوانیان هەیە کە ماوە ماوە لەسەر چەند پرسێکی گرنگ کۆبوونەوە و دانیشتنیان دەبێت، دوا کۆبوونەوەی نێوانیان لەسەر ئاستی باڵا، لە ساڵی 2023 بوو، ئەوەی ئەمجارەش چوارەم کۆبوونەوەی باڵا بوو، شاندی هەرێمی کوردستانیش لەگەڵ عێراق بەشداری کۆبوونەوەکەی کرد.

ئەمەش بزانە: شاندی حکومەتی فیدراڵی پێکهاتبوون لە "فوئاد حوسێن، وەزیری دەرەوە و بەکر فەتاح، بەڕێوەبەری بەڕێوەبەرایەتیی ئەوروپا لە ناو وەزارەتی دەرەوەی عێراق، باڵیۆزی عێراق لە برۆکسل و ستافەکەی، دوو بەڕێوەبەری گشتی لە وەزارەتی بازرگانی و وەزارەتی نەوتی عێراق".

- شاندی هەرێمی کوردستانیش  پێکهاتبوون لە "سەفین دزەیی، بەرپرسی فەرمانگەی پەیوەندییەکانی دەرەوە و سەلیم پاشا، ڕاوێژکار لە فەرمانگەی پەیوەندییەکانی دەرەوە، هەروەها دلاوەر ئاژگەیی، نوێنەری حکومەتی هەرێمی کوردستان لە بەلجیکا و یەکێتی ئەوروپا".