هۆشیار زێباری: پێشوازیی لە بڕیاری دەستنیشانكردنی نێردەی ئەمریكا بۆ عێراق دەكەین

ئاڤا نیوز

وەزیری پێشووتری دەرەوەی عێراق دەڵێت، بڕیارەکەی سەرۆکی ئەمریکا بۆ دانانی نێردەی تایبەتی وڵاتەکەی بۆ عێراق، مانای وایە عێراق دۆخێکی ناسرووشتی هەیە و چارەسەری پشێوویی و ئاڵۆزییەکانی وڵاتەکە پێویستی بە بڕیاری دەرەوەی چوارچێوەی دیپلۆماسی بەرکار هەیە، بۆیەش پێشوازیی لە دامەزراندنی مارک ساڤایا وەک نێردەی تایبەتی ئەمریکا دەکەن.

ئەوەی پێویستە بیزانیت: دوێنێ دۆناڵد ترەمپ، سەرۆکی ئەمریکا ڕایگەیاند، مارک ساڤایای وەک نێردەی تایبەتی ئەمریکا بۆ عێراق دیاریکردووە، ترەمپ باوەڕی وایە ئەزموونی مارک لە پێشخستنی بەرژەوەندییەکانی گەلی ئەمریکا یارمەتیدەر دەبێت.

ڕاگەیێنراوی فەرمی: هۆشیار زێباری، وەزیری پێشووتری دەرەوەی عێراق کە هاوکاتە ئەندامی دەستەی کارگێڕیی مەکتەبی سیاسی پارتی دیموکراتی کوردستانیشە، لە هەژماری خۆی لە تۆڕی ئێکس نووسیویەتی، دامەزراندنی مارک ساڤایا بە نێردەی تایبەتی ئەمریکا بۆ عێراق، کە هاووڵاتییەکی ئەمریکی (مەسیحی کلدانی بە ڕەچەڵەک عێراقییە) لەلایەن دۆناڵد ترەمپەوە، داننانە بەوەی کە دۆخی عێراق ناسروشتییە و پێویستی بە ڕێکار و بڕیاری دەرەوەی چوارچێوەی دیپلۆماسی و فەرمی بەرکار هەیە، بۆ ڕاستکردنەوە و چارەسەری دۆخە پشێو و ئاڵۆزەکان، بۆیە پێشوازیی لە دامەزراندنی مارک ساڤایا دەکەن و هیوای سەرکەوتنی لە ئەرکەکەیدا بۆ دەخوازن.

بەوتەی زێباری بڕیارەکەی ترەمپ بوێرانەیە بە ئامانجی گەڕاندنەوەی سەروەری و سەربەخۆیی عێراق، دوور لە گەندەڵی، خراپ بەڕێوەبردنی سەرچاوەکان و حوکمڕانی میلیشیاکان.

لەلایەکی دیکەوە: هەر پەیوەست بەم بابەتەش هۆشیار سیوەیلی، بەرپرسی پەیوەندییەکانی دەرەوەی پارتی دیموکراتی کوردستان ڕایگەیاند، دەبێت چاوەڕێ بکەن تا بزانن لە ڕۆژانی داهاتوو و دوای دەستبەکاربوونی، مارک ساڤایا چۆن لە گەڵ کێشە ئاڵۆزەکانی عێراقدا مامەڵە دەکات.

سیوەیلی دەشپرسێت ئایا ئەم بەڕێزە پۆڵ بریمەرێکی ترە، یان لە نزیکەوە لەگەڵ هەرێمی کوردستان دەربارەی داهاتوویەکی باشتر بۆ عێراق دەکەوێتە گفتوگۆوە؟.