کارگەی زەیتی زەیتوونی "ئەبو حوسێن" لە هەولێر بەتۆمەتی ساختەکاری دەستی بەسەردا گیرا

ئاڤا نیوز

 

لیژنە هاوبەشەکانی قایمقامیەتی پارێزگای هەولێر دەستیان بەسەر کارگەیەکی زەیتی زەیتووندا گرت، کە ڕۆنی چێشتی ئاسایی لەگەڵ ڕەنگ و بۆنی تایبەتی تێكەڵ دەكرد و بە نرخی زەیتی زەیتوون دەیخستە بازاڕ.

 

چیرۆکی سەرەکی: هێزەکانی ئاسایشی هەولێر بە هەماهەنگی لەگەڵ ژووری چاودێریی بازرگانی و لیژنەکانی قایمقامیەتی هەولێر، لە ئەنجامی پشکنین و گەڕاندا، دەستیان بەسەر كارگەیەكی بێ مۆڵەتی زەیتی زەیتووندا گرت و ژمارەیەک لە سەرپەرشتیارانیان دەستگیر کرد.

 

لێدوانی فەرمی: هۆگر عەلی، بەڕێوەبەری چاودێریی بازرگانیی هەولێر، بە ئاڤا میدیای ڕاگەیاند، بەرهەمەکانی ئەم کارگەیە هیچ مەرجێكی تەندروستیی تێدا نییە و بە هیچ شێوەیەك شیاوی خواردن نییە، ڕۆنی چێشتی ئاسایی لەگەڵ ڕەنگ و بۆنی تایبەتی تێكەڵ دەكرد. گوتیشی، دوای داخستنی کارگەکە سێ کەسمان لە شوێنەکە دەستگیر کردووە.

 

هۆگر عەلی دەڵێت،  كارگەكە لە هەولێر دەكەوێتە نزیك گوندی گەزنە، چەندان كاری ساختەی كردووە و لەوانە: ڕۆنی چێشتی ئاسایی لەگەڵ ڕەنگ و بۆنی تایبەت، تێكەڵی زەیتی زەیتوون كردووە و وەك زەیتی زەیتوونی سرووشتی فرۆشتوویەتی.

 

بەڕێوەبەری چاودێریی بازرگانیی هەولێر داوای لە خاوەن دووكان و ماركێتەكانیش کرد، "بە زووترین كات ئەم جۆرە زەیتە و ئەو بەرهەمانەی لەناو كارتۆنی سپی و بێ ناسنامەدا دەفرۆشرێن لەسەر ڕەفەكانیان لاببەن".

 

ئەوەی پێویستە بیزانیت: كارگەكە ناوی زەیتی زەیتوونی "ئەبو حوسێنە"، بە ناوی شەقڵاوە بەرهەمەكانی دەخستە بازاڕەوە، شوێنەكەشیان لە دووریی خەڵك بووە و بەنهێنی كاریان تێدا كردووە.