پەیامی سەرۆک بارزانی بۆ خەڵکی هەولێر

ئاڤا نیوز

 

سەرۆک بارزانی لەمیانی کۆبوونەوەی لەگەڵ بەشێکی چین و توێژە جیاوازەکانی خەڵکی هەولێر ڕایگەیاند، "کە باسی هەولێر دەکرێت واتا باسی مێژووی چەند هەزار ساڵەی ئەم وڵاتە دەکرێت، ئەمڕۆ هەولێر پایتەختە و جێگە و پەناگەی هەمووی لێقەوماوێک و هەموو ئازادیخوازێکە.

 

چیرۆکی سەرەکی؛ ئەمڕۆ سێشەممە لەچوارچێوەی بەڕێوەچوونی هەڵمەتی هەڵبژاردن بۆ پەرلەمانی عێراق سەرۆک بارزانی لەگەڵ بەشێکی چین توێژە جیاوازەکانی خەڵکی هەولێری پایتەخت کۆبووەوە؛ 

 

لێدوانی فەرمی؛ سەرۆک بارزانی باسی لە گرنگیی هەڵبژاردنی ئەمجارەی پەرلەمانی عێراق کرد و گوتی: "هەر هەڵبژاردنێک گرنگە و بە نسبەت ئێمە شتێکی مەبدەئییە و بڕوامان بەوە هەیە کە میللەت بڕیار لە چارەنووسی خۆی بدات. دووپاتیشی کردەوە پێویستە هەڵبژاردنێکی پاک و بێگەرد لە کەشێکی ئارامدا بکرێت".

هیوایشی خواست دوای ئەم هەڵبژاردنە گۆڕانکاری بکرێت و خەڵکێک بێت کە هەست بە بەرپڕسیاریەتی بکات و چارەسەری کێشەکان بکرێت.

لەلایەکی دیکە؛ لەبارەی کاروانی ئاوەدانی و پرۆژە خزمەتگوزارییەکان سەرۆک بارزانی گوتی: پرۆژەی زۆر کراوە، ئەمە منەتی تێدا نییە و ئەمە ئیشی حکوومەتە، پارتی بۆ ئەوە دامەزراوە خزمەتی ئەم میللەتە بکات، پارتی هەرچی بیکات بۆ ئەم میللەتە و بۆ هەولێر هێشتا کەمە.

لە وەسفی هەولێریشدا گوتی: هەولێر شاری پێکەوەژیانە، فەرهەنگی پێکەوەژیان فەرهەنگێکی دەوڵەمەندە و ئێمە پێی سەربەرزین و بەهێزترین چەک بووە بەدەست ئێمە لە دەرەوە و لە هەموو ناوەندە نێودەوڵەتییەکان کە شانازیی پێوە دەکەین و دەبێ ئەم فەرهەنگە بۆ نەوەکانی داهاتوو قووڵتر و بەهێزتر بکرێت.

ئەوەی پێویستە بیزانیت؛ سەبارەت بە دۆخی کوردستان و پڕسی پێکهێنانی حکوومەتی نوێ سەرۆک بارزانی دووبارە جەختی کردەوە کە پێش هەڵبژاردنی ئەنجوومەنی نوێنەرانی عێراق حکوومەتی نوێ پێکبهێنڕێت.