ئیمارات لە سێ بوار ڕاهێنان بە 30 هەزار گەنجی کوردستان دەکات

ئاڤا نیوز

 

هەرێمی کوردستان و ئیمارات زیاتر لە 30 دەستپێشخەریی هاوبەشیان ڕاگەیاند، کە ئامانج لێی سوودوەرگرتنە لە ئەزموون و شارەزایی دەوڵەتی ئیمارات بۆ پەرەپێدانی کەرتە جیاوازەکانی حکومەتی هەرێمی کوردستان، بڕیاریشە لەو چوارچێوەیەدا ئیمارات ڕاهێنان بە 30 گەنجی هەرێمی کوردستان بکات.

 

چیرۆکی سەرەکی؛ ئەمڕۆ سێشەممە، مەسرور بارزانی، سەرۆکوەزیرانی کوردستان، پێشوازی لە شاندێکی باڵای دەوڵەتی ئیماراتی یەکگرتووی عەرەبی کرد بە سەرۆکایەتی عەبدوڵڵا ناسر لوتاە، یاریدەدەری وەزیری کاروباری ئەنجومەنی وەزیران بۆ ئاڵوگۆڕی ئەزموون و کێبڕکێ. لە کۆبوونەوەکەدا، هەردوولا جەختیان لە پەرەپێدانی پەیوەندییە دووقۆڵییەکان و هاوکاریکردن لە بوارە جیاجیاکاندا کردەوە.

 

ئەوەی پێویستە بیزانیت؛ سەرۆکوەزیران مەسرور بارزانی، پێزانینی حکومەتی هەرێمی کوردستانی بۆ پشتیوانییە بەردەوامەکانی دەوڵەتی ئیمارات دەربڕی و بەتایبەتی سوپاسی هەریەک لە شێخ محەمەد بن زاید ئال نەهیان، سەرۆکی ئیمارات، و شێخ محەمەد بن ڕاشد ئال مەکتووم، جێگری سەرۆک و سەرۆک وەزیرانی ئیماراتی کرد.

 

بۆچی گرنگە؛ یەکێک لە تەوەرە سەرەکییەکانی کۆبوونەوەکە، ڕاگەیاندنی زیاتر لە 30 دەستپێشخەریی هاوبەش بوو کە ئامانج لێی سوودوەرگرتنە لە ئەزموون و شارەزایی دەوڵەتی ئیمارات بۆ پەرەپێدانی کەرتە جیاوازەکانی حکومەتی هەرێمی کوردستان. ئەم دەستپێشخەرییانە بوارەکانی وەک سیستمی بەڕێوەبردن، بەرزکردنەوەی ئاستی حکومی، دیجیتاڵکردنی خزمەتگوزارییەکان، ئابووری، وەبەرهێنان، تەندروستی، و گۆڕانی کەشوهەوا دەگرێتەوە.

 

زانیاریی زیاتر؛ یەکێک لە پرۆژە هەرە دیارەکانی ئەم هاوکارییە، دەستپێشخەریی "کۆدنووسانی کوردستان"ە. ئەم پرۆژە ستراتیژییە ئامانجی ڕاهێنانی 30 هەزار گەنجی کوردە لە بوارەکانی کۆدنووسین، زیرەکیی دەستکرد، و شارەزایی دیجیتاڵی. مەبەست لەم هەنگاوە، بەهێزکردنی تواناکانی نەوەی نوێ و ئامادەکردنیانە بۆ بازاڕی کاری داهاتوو، تا بتوانن ببنە داهێنەر و خاوەنکاری سەرکەوتوو لە کوردستاندا.