بۆ یەکەمجار کامێرای تیژڕۆیی لە شەقامەکانی کەرکووک دادەنرێت

ئاڤا نیوز

 

هاوشێوەی شارەکانی هەرێمی کوردستان، بەڕێوەبەرایەتیی هاتووچۆی کەرکووک دەستی کردووە بە دانانی کامێرای تۆمارکردنی تیژڕۆیی لەسەر شەقامە سەرەکییەکانی شارەکە، بە ئامانجی کەم کردنەوەی ڕووداوەکانی هاتووچۆ و پاراستنی گیانی هاووڵاتییان.

 

لێدوانی فەرمی؛ عەقید عامر نەریمان، وتەبێژی پۆلیسی هاتووچۆی کەرکووک، لە لێدوانێکدا بۆ ئاڤا ڕایگەیاند: "لەمڕۆوە پرۆسەی دانانی کامێراکانی چاودێریی تیژڕۆیی دەستیپێکردووە و لە زۆرینەی شەقام و ڕێگە سەرەکییەکانی کەرکووک دادەنرێن."

 

ئەوەی پێویستە بیزانیت؛ گرنگترین ئەو شوێنانەی کامێرایان لێ دادەنرێت بریتین لە:

ڕێگای کەرکووک - سلێمانی
ڕێگای کەرکووک - هەولێر
شەقامی پشتێنەیی کەرکووک
شەقامی فڕۆکەخانەی کەرکووک
چەندین شەقام و ڕێگای دیکەی گرنگی ناو شار

وتەبێژی هاتووچۆی کەرکووک ئاماژەی بەوەشکرد کە سیستمی کامێراکان ڕاستەوخۆ بە سیستمی بەڕێوەبەرایەتیی گشتیی هاتووچۆی عێراق لە بەغدا دەبەسترێتەوە، بەمەش سەرپێچییەکان لە سیستەمی ناوەندیدا تۆمار دەکرێن.

 

ئەمە بزانە؛ ئەم هەنگاوەی حکومەتی عێراق بۆ پاراستنی سەلامەتیی گیانی هاووڵاتییان لە کەرکووک لە کاتێکدایە ساڵانێکە لە شارەکانی هەرێمی کوردستان لەلایەن حکومەتی هەرێمی کوردستانەوە پەیڕەو دەکرێت و کاریگەریی بەرچاوی لە کەم کردنەوەی ڕووداوەکانی هاتووچۆدا هەبووە.