عێراق لەبارەی قەدەغەی هاتووچۆ لە ڕۆژی دەنگدان بڕیاری دا

ئاڤا نیوز

لیژنەی ئاسایشی هەڵبژاردنی پەرلەمانی عێراق ئاشکرای دەکات، لە ڕۆژی دەنگدان قەدەغەی هاتووچۆ لەناو شار و نێو پارێزگاکان ڕاناگەیێنرێت. بەڵام کۆمیسیۆنی جەخت لەسەر قەدەغەکردنی بردنی مۆبایل و کامێرا بۆ نێو بنکەکانی دەنگدان دەکاتەوە.

 

چیرۆکی سەرەکی؛ بڕیارە ڕۆژی 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانی عێراقیش دڵنیایی لە بە نهێنی بەڕێوەچوونی پرۆسەکە دەدات؛ بۆ ئەو مەبەستەش کۆمیسیۆن چەندین ڕێکاری بۆ باش بەڕێوەچوونی هەڵبژاردن گرتووەتەبەر.

 

لێدوانی فەرمی؛ فەریق یەکەمی ڕوکن قەیس محەممەداوی، سەرۆکی لیژنەی باڵای ئەمنی بۆ هەڵبژاردن دووپاتی کردەوە، "لیژنەکە بە هەماهەنگی لەگەڵ کۆمسیۆنی باڵای سەربەخۆی هەڵبژاردنەکان پابەندە بە دەستەبەرکردنی ئازادیی هاتووچۆی هاووڵاتیان و ڕێگریکردن لە هەر قەدەغەیەکی هاتووچۆ یان داخستنی ڕێگاوبانەکان لە ماوەی پرۆسەی هەڵبژاردنەکان.

 

ناوبراو جەختی لە دەستەبەرکردنی ئاسایشی فڕۆکەخانەکان و دەروازە نێودەوڵەتییەکان کردەوە بۆ دوورکەوتنەوە لە هەر ئاستەنگێک لەبەردەم هاتووچۆی هاووڵاتیان و چاودێرانی نێودەوڵەتیدا.

 

لەلایەکی دیکە؛ کۆمیسیۆن ڕایگەیاندووە، هێنانی کامێرا یان ئامێری وێنەگرتن بۆ ناو بنکەکانی دەنگدان قەدەغەیە بۆ پاراستنی نهێنیی دەنگدان و پاکیی و بێگەردیی ڕێکارەکان، کۆمیسیۆن هۆشداریش دەدات کە دەنگدەران ناتوانن بچنە ناو بنکەیەکی دەنگدان، ئەگەر کارتی بایۆمەترییان پێ نەبێت.