یارییەكانی یانەی هەولێر گەڕایەوە یاریگەی خۆی؛ چوونەژوورەوە بەخۆڕاییە

ئاڤا نیوز

دوای تەواوبوونی كارەكانی نۆژەنكردنەوەی یاریگەكەی، یانەی هەولێر یەكەم یاری خۆی لەم وەرزەی خولی ئەستێرەكانی عێراق لەسەر یاریگەی خۆی و لەبەردەم هاندەرانی ئەنجام دەدات، ئەم هەینیە لە یاری لوتكەی خولەكە میوانداری یانەی شوڕتە دەكات، لەسەر ڕاسپاردەی پارێزگاری هەولێر، سەرۆكی فەخری یانەكەش، چوونەژووەرەوەی هاندەران بۆ نێو یاریگە بەخۆڕایی دەبێت.

وێنە گەورەكە: دوای تەواوبوونی وەرزی ڕابردووی خولی ئەستێرەكانی عێراق لە 15-7-2025، كارەكانی نۆژەنكردنەوەی یاریگەی شەهید فرەنسۆ هەریری دەستیپێكرد و تاوەكو چەند ڕۆژێك لەمەوبەر، كاركردن لە یاریگەكە بەردەوام بوو، بەهۆیەوە هەولێر چوار یاریی سەرەتای خولی ئەمساڵی ئەستێرەكانی عێراقی لە یاریگەی دهۆك ئەنجامدا، یارییەكەی ڕۆژی هەینی 24ـی 10ـی 2025 بەرامبەر یانەی شوڕتە، یەكەم یاری یانەكەی قەڵاو منارە دەبێت لەسەر یاریگەی خۆی و لەبەردەم هاندەرانی، كە بڕیارە كاتژمێر 6ـی ئێوارە ئەنجام بدرێت.

زانیاریی پەیامنێر: یاسر محەممەد، پەیامنێری وەرزشیی ئاڤا میدیا، موژدەیەكی لە زاری ئومێد خۆشناو، پارێزگاری هەولێر كە لەهەمان كاتدا سەرۆكی فەخری یانەی هەولێرە وەرگرت، كە چوونەژوورەوەی هاندەران بۆ یارییەكەی ڕۆژی هەینی بەرامبەر یانەی شوڕتە بەخۆڕایی دەبێت، ئەوەش دوای داواكاریی سەرۆكی یانەی هەولێر و ئەندامانی دەستەی كارگێڕی و دەستەی هاندەران.

ئەوەی پێویستە بیزانیت: یانەی هەولێری خاوەنی چوار نازناوی عێراق، ئەم وەرزە لە بارودۆخێكی باشدایە و تیمەكە لە چوار یاری، سێ بردنەوە و یەكسانبوونێكی هەیە و لە پلەی دووەمی ڕیزبەندی دەبینرێت، ئەگەر یانەی دیالە لە یارییەكەی بەرامبەر مووسڵ بە براوە هەژمار نەكرابووایە، ئەوا ئێستا هەولێر لە پێشەنگی یانەكان بوو، یانەی شوڕتەش سێ یاری ئەنجامداوە و هەر سێ یارییەكەی بردووەتەوە و لە پلەی چوارەم دەبینرێت، بۆیە پێشبینی یارییەكی بەهێز و ئامادەبوونی زۆرترین هاندەر دەكرێت.

زانیاریی زیاتر: پەیامنێری ئاڤا لە زاری ستافی راهێنەرانی یانەكە ئەوەشی زانیوە، یاریكردنی مستەفا قابیل و سەرهەنگ موحسین، دیارترین دوو ئەستێرەی یانەی هەولێر بۆ یارییەكەی شوڕتە، هێشتا یەكلایی نەبووەتەوە كە بەهۆی پێكانەوە دابڕاون.