قەتەر و تورکیا یاداشتێکی هاوبەشی بەرگری واژۆ دەکەن

ئاڤا نیوز

میری قەتەر و سەرۆککۆماری تورکیا، سەرپەرشتی 11ـیەمین دانیشتنی لیژنەی باڵای ستراتیژیی نێوان هەردوو وڵاتیان کرد و چەند یاداشتێکی لێکتێگەیشتنیان لە کەرتی بەرگریدا واژۆ کرد.

چیرۆکی سەرەکی: لە میانی سەردانەکەی ڕەجەب تەیب ئەردۆغان، سەرۆککۆماری تورکیا بۆ قەتەر چەند یاداشتی لێکتێگەیشتنیان واژۆ کرد وەکو؛ یاداشتنامەی لێکتێگەیشتن سەبارەت بە هاوکاری لە بواری پیشەسازیی بەرگری و یاداشتی لێکتێگەیشتن بۆ هاوکاری و ئاڵوگۆڕی شارەزایی لە بواری پلاندانانی پەرەپێدانی ستراتیژی.

ڕاگەیێنراوی فەرمی: ماڵپەڕی هەواڵی فەرمیی قەتەر ڕایگەیاند: هەردوولا پەیوەندییە ستراتیژییەکانی هاریکاری و ڕێگاکانی پەرەپێدانیان لە بوارەکانی بەرگری، بازرگانی، وەبەرهێنان، وزە و تەکنەلۆجیای زانیاری تاوتوێ کرد، هاوکات پرسە سەرەکییە ناوچەیی و نێودەوڵەتییەکان، دیارترینیان پێشهاتەکانی کەرتی غەززە و فەڵەستین و ئاگربەست و گەیاندنی هاوکارییەکان بۆ غەززە خرانە بەرباس.

هەردوو وڵات ئاواتەخوازن قەبارەی بازرگانی لە 1.1 ملیار دۆلارەوە بۆ 5 ملیار دۆلار زیاد بکەن، ئەمەش بە سوودوەرگرتن لە ڕێککەوتنی هاوبەشی بازرگانی و ئابووری کە لە یەکی مانگی ئابی ئەمساڵ کەوتە بواری جێبەجێکردنەوە.

باکگراوند: ڕۆژی سێشەممە، ئەردۆغان بە یاوەری شاندێکی باڵا گەیشتە دەوحە لە چوارچێوەی گەشتێکی بۆ سێ وڵاتی کەنداو کە لە کوێت دەستیپێکرد و لە عومان کۆتایی دێت لەسەر داوای سەرکردەکانی ئەو سێ وڵاتە.