پاش کەمتر لە 24 کاتژمێر حکومەتی عێراق لە بڕیارێکی پاشگەز دەبێتەوە

ئاڤا نیوز

دوای ئەوەی حکومەتی عێراق بڕیاریدا، لە بەرامبەر ڕاییکردنی مامەڵە فەرمییەکان، دەبێت هاووڵاتیان پسوولەی پێدانی باجی خزمەتگوزاریی گشتی پێشکەش بکەن، پاشگەزبووە و ئەمیندارێتی گشتی ئەنجوومەنی وەزیرانیش دەڵێت "بڕیارەکە تەنیا چینێکی دیاریکراو دەگرێتەوە."

چیرۆکی سەرەکی: ئەنجوومەنی وەزیرانی عێراق لە کۆبوونەوەی ئاسایی خۆیدا بڕیاریدا، لەمەودوا یەکێک لەمەرجەکانی ڕاییکردنی مامەڵەی فەرمی لە فەرمانگاکانی حکومەتدا، پێشکەش کردنی دوا پسوولەی پێدانی کرێی کارەبا، پەیوەندییەکان، ئاو، ئاوەڕۆ و سەرجەم باجی دیکەی گشتی دەبێت.

ڕاگەیێنراوی فەرمی: ئەمیندارێتی گشتی ئەنجوومەنی وەزیرانی عێراق لە ڕاگەیێنراوێکدا ڕایگەیاند: ئەوەی لە هەندێک ماڵپەڕ و تۆڕە کۆمەڵایەتییەکان بڵاوکراوەتەوە سەبارەت بە سەپاندنی سیستەمی کۆکردنەوەی باج لە هاووڵاتیان و ڕایینەکردنی هیچ مامەڵەیەک لە فەرمانگەکانی دەوڵەتدا، تەنیا پاش پێدانی کرێی کارەبا و ئاو، تەنیا خاوەنکار و خاوەن کارگە و لایەنە حکومییەکان دەگرێتەوە.

ئه‌وه‌ی له‌باره‌یه‌وه‌ دەگوترێت: بڕیارەکە ڕووبەڕووی ڕەخنەی زۆر و فراوان بووەوە لە هەندێک کەناڵی ڕاگەیاندن و تۆڕە کۆمەڵایەتییەکاندا، هاووڵاتیان لە جیاتی دەرکردنی بڕیاری لەم شێوەیە، داوای ئاسانکاری مامەڵە فەرمییەکانیان لە کاتی سەردانیکردنی فەرمانگەکاندا کرد.