ئەنجوومەنی دادوەری عێراق تیرۆرکردنی سەفا مەشهەدانی یەکلایی دەکاتەوە

ئاڤا نیوز

ئەنجوومەنی دادوەری عێراق وردەکاری نوێی لێکۆڵینەوەکانی لەگەڵ بکوژانی سەفا مەشهەدانی، ئەندامی ئەنجوومەنی پارێزگای بەغدا و کاندیدی هەڵبژاردنەکان ئاشکرا کرد و دەڵێت " تیرۆرکردنی مەشهەدانی پەیوەندی بە ململانێی هەڵبژاردنەوە هەبووە".

چیرۆکی سەرەکی: بەرەبەیانی ڕۆژی چوارشەممە، 15ـی ئەم مانگە، سەفا مەشهەدانی، ئەندامی ئەنجوومەنی پارێزگای بەغدا لە هاوپەیمانی "سیادە"، بەهۆی تەقینەوەی بۆمبێکی لکێنراو بە ئۆتۆمبێلەکەیەوە لە قەزای تارمییەی باکووری بەغدای پایتەخت، کوژرا.

ڕاگەیێنراوی فەرمی: دادگای لێکۆڵینەوەی کەرخی یەکەم، لە زاری دادوەری دادگای لێکۆڵینەوەی تایبەتمەند ڕایگەیاند: لێکۆڵینەوەکان سەلماندوویانە کە ڕووداوەکە تاوانکاریی بووە و پەیوەندی بە ململانێی هەڵبژاردنەوە هەبووە.

ئەمەش بزانە: سێشەممەی ڕابردوو، 21-10-2025 تۆمەتبارانی تیرۆرکردنی مەشهەدانی ئاشکرا کران، ناوی تۆمەتبارەکان ئەمانە بوون؛ عومەر موسەننا عەبدولمەنعەم مەشهەدانی، مستەفا ئەحمەد سەلمان دلێمی، حوسێن فاروق جەنابی، عەبدوڵڵا عەبدولڕەحمان مەشهەدانی و عەلا موحسین عەبوود مەشهەدانی.