بۆ پرسی هەڵبژاردن؛ فەرماندەی سوپای قودسی ئێران بە نهێنی دێتە عێراق

ئاڤا نیوز

ئیسماعێل قائانی، فەرماندەی سوپای قودسی ئێران، لە چەند ڕۆژی ڕابردوودا بە نهێنی سەردانی عێراقی کردووە و لەگەڵ کەسایەتییە سیاسی و بەرپرسانی گرووپە میلیشیاییە شیعەکانی عێراق کۆبووەتەوە.

چیرۆکی سەرەکی: بە گوێرەی چەند ڕاپۆرتێک، سەردانەکەی قائانی ڕۆژی 21-10-2025 بووە و تەنیا چەند کاتژمێرێکی خایاندووە. لەو ماوەیەدا لەگەڵ بەرپرسانی چوارچێوەی هاوئاهەنگی کۆبووەتەوە. قائانی داوای کردووە سەرکردەکانی شیعەکان جیاوازییەکانیان وەلا بنێن و ڕێگە لە دابەشبوونی نێوانیان بگرن و پێکەوە کار بۆ هەڵبژاردنی عێراق بکەن. 

زانیاریی زیاتر: بە گوێرەی ڕاپۆرتەکان، لەوانەش ڕاپۆرتی ڕۆژنامەی قەتەریی 'عەرەبییە جەدیدە'، ناکۆکیی نێوان بلۆکی شیعی لە عێراق زیاتر بووە و ئێران هەوڵی کەمکردنەوەی ئەو ناکۆکییانە دەدات. 

ئەمەش بزانە: بڕیارە 11-11-2025 هەڵبژاردنی پەرلەمانیی عێراق بەڕێوە بچێت کە دەبێتە شەشەم هەڵبژاردنی پەرلەمانی لە دوای ڕوخانی ڕژێمی بەعس لە ساڵی 2003.