هێزە ئەمنییەکانی لیبیا 23 کۆچبەری عێراقی دەستگیر دەکەن

ئاڤا نیوز

باڵیۆزخانەی عێراق لە تەرابلوس، دەستگیرکردنی 23 کۆچبەری عێراقی کە بە شێوەیەکی نایاسایی چووبوونە ناو لیبیاوە ڕاگەیاند. 

وێنە گەورەکە: لیبیا بووەتە یەکێک لە ڕێڕەوەکانی گەیشتن بە وڵاتانی ئەوروپا بە ڕێگای نایاسایی، بەشێک لە گەنجانی عێراق و هەرێمی کوردستان بۆ گەیشتن بە کەناراوەکانی ئیتاڵیا ڕێگای ئەو وڵاتە دەگرنە بەر، بەڵام لەلایەن هێزە ئەمنییەکانی لیبیاوە دەستگیر دەکرێن و ڕووبەڕووی دۆخی نەخوازراو و ئەشکەنجەدان دەبنەوە.

لێدوانی فەرمی: ئەحمەد سەحاف، کارگێڕی باڵیۆزخانەی عێراق لە لیبیا، ڕایگەیاند: بە هاوکاریی دەسەڵاتدارانی لیبیا، باڵیۆزخانەی عێراق دەستبەجێ دەستی بە ڕێکارەکانی سەلماندنی ناسنامەی ئەو کۆچبەرانە و ئاسانکاری بۆ گەڕانەوەیان کردووە.

زانیاریی زیاتر: سەحاف ئاماژەی بەوەدا، بۆ دڵنیابوون لە سەلامەتی ڕۆڵەکانیان، باڵیۆزخانەی عێراق لە لیبیا پەیوەندی لەگەڵ کەس و کاری ئەو کۆچبەرانەوە کردووە.

ئەمەش بزانە: کارگێڕی باڵیۆزخانەی عێراق لە لیبیا، جەختی لەوەش کردەوە، کە تۆڕەکانی قاچاخچێتی و بازرگانیکردن بە مرۆڤەوە یاری بە ژیانی گەنجانی عێراق دەکەن و داوای زیاتر هۆشیاری کۆمەڵایەتی و هاوکاری ئەمنی بۆ سنووردارکردنی ئەم دیاردەیە کرد کە ژیانی کۆچبەران دەخاتە مەترسییەوە.