لە فێستیڤاڵی ساڵانەی بەرواری باڵا سەدان تۆن بەرهەمی سێو ساغ دەكرێتەوە

ئاڤا نیوز

ئەمڕۆ سێیەمین فێستیڤاڵی بەرهەمی خۆماڵی لە دەڤەری بەرواری باڵا دەستیپێكرد و ماوەی پێنج ڕۆژ بەردەوام دەبێت، ئامانج لێی؛ نمایشكردنی بەرهەمی جووتیارانی دەڤەرەكە و نیشاندانی كولتوور و هونەریی ناوچەكەیە بۆ ڕاكێشانی گەشتیاران و سەردانیكاران.

چیرۆكی سەرەكی: لە دەڤەری بەرواری باڵای سەر بە قەزای ئامێدی، 200 خێوەت هەڵدراون بۆ سازكردنی سێیەمین فێستیڤاڵی ساڵانەی بەرهەمی خۆماڵی، ئەمڕۆ هەینی 24ـی ئۆكتۆبەر بە نمایشكردنی بەروبوومی جووتیاران و كردنەوەی پێشەنگەی هونەری و كولتووری دەستی پێكرد و ماوەی پێنج ڕۆژ بەردەوام دەبێت.

لێدوانی فەرمی: ڕێبەر دێریشکی، ئەندامی لیژنەی سەرپەرشتییاری فێستیڤاڵەکە تایبەت بۆ ئاڤا ڕایگەیاند، زیاتر لە شەش مانگە ئامادەكاری بۆ ئەم فێستیڤاڵە دەكرێت و زیاتر لە 200 خێوەت لە كۆمەڵگەی بریفكا لەنێوان گوندی دۆرێ و ناحیەی كانی ماسی دانراوە بۆ ئەوەی زۆرترین ژمارەی گەشتیار و سەردانیكاران، ئاشنای لایەنی گەشتیاری و كشتوكاڵی دەڤەری بەرواری باڵا بن.

ڕوونیشی كردەوە، هۆكاری زیادكردنی ژمارەی خێوەتەكانی فێستیڤاڵەكە، بۆ سەركەوتنی فێستیڤاڵەكە لە ساڵانی ڕابردوو دەگەڕێتەوە كە ژمارەیەكی زۆری سەردانیكاران ئامادەی دەبوون.

زانیاریی زیاتر: لەپاڵ نمایشكردنی بەروبوومی كشتوكاڵی و شیرەمەنیی جووتیاران و ئاژەڵداران، پێشەنگەی هونەریش بۆ ژمارەیەك فۆتۆگرافەر دەكرێتەوە، هاوكات ژمارەیەك سترانبێژیش بە درێژایی ڕۆژانی فێستیڤاڵەكە، ستران دەبێژن.

لەلایەکی دیکەوە: ڕەمزی مایی، جووتیارێكی دەڤەری بەرواری باڵایە، قسەی بۆ ئاڤا كردووە و دەڵێت، "من 30 ساڵە خەریكی كاری جووتیاریم، زیاتر لە بیست تۆن سێوی سوور و زەردم هەیە و لە فێستیڤاڵەكە دەیفرۆشم، جووتیارانی هاوڕێشم بەهەمان شێوە بڕێكی زۆر بەرهەمی میوەیان ئامادە كردووە."