دەست بە دابەشكردنی پارەی گەنمی جووتیارانی سلێمانی دەكرێت

ئاڤا نیوز

پرۆسەی دابەشکردنی پارەی گەنمی جووتیارانی هەرێمی کوردستان لە سنووری پارێزگاکانی هەولێر و دهۆک بەردەوامە و دووسبەیش لە سنووری سلێمانی دەست بە دابەشکردنی پارەی گەنمی ئەو جووتیارانە دەکرێت کە گەنمەکانیان داوەتە عێراق.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانیی هەرێمی کوردستان بە ئاڤای وت: سبەی یەكشەممە بانکی ناوەندیی عێراق شەش ملیار دیناری پارەی گەنمی جووتیارانی سلێمانی  دەخاتە سەر هەژماری بانکیی بابان لە سلێمانی و ڕۆژی دووشەممە 27-10-2025، دەست بە دابەشکردنی پارەکە دەکرێت.

زانیاریی زیاتر: کۆی گشتیی پارەی گەنمی جووتیارانی کوردستان، زیاترە لە 300 ملیار دینارە، لە قۆناغی یەکەم 57 ملیار دینار ڕەوانە کرا بوو، ئەمجارە کە قۆناغی دووەمە و کۆی گشتیی پارەکە 15 ملیار و 500 ملیۆن دینارە، پێشتر پێنج ملیار بۆ پارێزگای هەولێر و زیاتر لە 4 ملیاری بۆ پارێزگای دهۆک نێردرابوو، ئەوەی مابوویەوە ئەوەی سلێمانی بوو کە شەش ملیار دینارە.


ئەمەش بزانە: ئەمساڵ لە سەرجەم پارێزگاکانی هەرێمی کوردستان 386 هەزار تۆن گەنمی جووتیاران دراوە بە عێراق.