ئیسرائیل: 60% تونێلەکانی حەماس ماون

ئاڤا نیوز

ئیسرائیل ئاشكرای دەکات، سەرەڕای شەڕی دوو ساڵەی کەرتی غەززە، 60% تونێلەکانی حەماس بوونیان ماوە.

لێدوانی فەرمی: کەناڵی 12 ئیسرائیلی لە زاری ئیسرائیل کاتز، وەزیری بەرگری ئیسرائیلەوە بڵاویکردووەتەوە، زیاتر لە 60% تونێلەکانی حەماس لە کاتی شەڕی کەرتی غەززەدا لەناو نەچووە و ماون، هاوکات ئاماژە بەوەش دەکات، پێویستە  دەست بەسەر چەکەکانی حەماسدا بگرین و دڵنیابین لەوەی کە هیچ ڕۆڵێکی لە غەززەدا نییە.

زانیاریی بەدەستهاتوو: سەرەڕای ئەوەی ئیسرائیل پێشتر چەندان ڕێگەی تاقیکردووەتەوە بۆ لەناوبردنی تونێلەکان، بەڵام بەشێکی زۆری تونێلەکان هێشتا وەک خۆیان ماونەتەوە، پەیوەست بەمەش لە میانی گفتوگۆی کاتز لەگەڵ جەی دی فانس، جێگری سەرۆکی ئەمریکا ئاشکرای کردووە، "لەناوبردنی تونێلەکان گرنگترین ئەرکی هاوبەشە لە داماڵینی چەک لە غەززە، بەپێی پلانی ترەمپ، دەبێت ئامادەکاری بۆ جێبەجێکردنی ئەم ئەرکە بکرێت.

زانیاریی زیاتر: ئەمە لە کاتێکدایە، لە سەرەتای ئەمساڵدا بەرگریی ئیسرائیل ئاشكرای کردبوو لە سەرەتای شەڕی غەززەوە 25%ی تونێلەکانی حەماس لە سەرانسەری کەرتی ناوچەکەدا لەناوبردووە.