مەسرور بارزانی: خوێن و ڕۆحمان بۆ کەرکووک دادەنێین و دەیگەڕێنینەوە

ئاڤا نیوز

بە ئامادەبوونی مەسرور بارزانی، جێگری سەرۆکی پارتی ئاهەنگی بانگەشەی کەرکووک - گەرمیانی پارتی لە هەولێر بەڕێوەچوو لە وتەیەکدا مەسرور بارزانی وتی، خوێن و ڕۆحمان بۆ کەرکووک دادەنێین و هەر دەیگەڕێنینەوە و نابێت یەک بستی خاکی کوردستان لەژێر دەستی داگیرکەردا بمێنێت

چیرۆکی سەرەکی: پارتی بە لیستی ژمارە 275 هەڵمەتی بانگەشەی هەڵبژاردنی لەسەرجەم شارەکانی عێراق دەستپێکردووە، لەوچوارچێوەیەشدا چەندین ئاهەنگی جەماوەری بۆ ناساندنی کاندیدانی بەڕێوەبردووە.

پەیامی فەرمی: مەسرور بارزانی، لەمیانی پێشکەشکردنی وتارێک ڕایگەیاند، "کەرکووک خاکێک نییە بتوانین وازی لێبهێنین و هەر دەبێت کەرکووک بگەڕێنینەوە باوەشی خاکی کوردستان". وتیشی، خوێن و ڕۆحمان بۆ کەرکووک دادەنێین و هەر دەیگەڕێنینەوە و نابێت یەک بستی خاکی کوردستان لەژێر دەستی داگیرکەردا بمێنێت

 

لە بەشێکی دیکەی قسەکانیدا جێگری سەرۆکی پارتی گوتی، "ستەمێكی گەورە لە خەڵكی ناوچە كوردستانییەكانی دەرەوەی هەرێمی کوردستان كراوە." داواشی لە خەڵکی کەرکووک کرد "دەنگ بە پارتی بدەن تاوەکو وەک شارەکانی هەرێمی کوردستان خزمەتیان بکرێت."

 

مەسرور بارزانی گوتیشی، "ئێمە تەنیا بەرگری لە مافی کورد ناکەین، بەڵکو بەرگری لە مافی هەموو پێکهاتەکانی دیکەش دەکەین، بۆ ئەوەی ڕێڕەوی حکومڕانی ڕاست بکرێتەوە خزمەتی هەموولایەک بکرێت".