مەسرور بارزانی: ڕێگریكردن لە پێكهێنانی حكومەت دەستكەوت نییە تاوەكو شانازی پێوە بكرێت

ئاڤا نیوز

مەسرور بارزانی لە ئاهەنگی بانگەشەی کەرکووک - گەرمیانی پارتی ڕایگەیاند: بەربەست دروستکردن بۆ جێبەجێکردنی کار و پڕۆژەکانی حکومەت و بەربەست دروستکردن بۆ پێکهێنانی حکومەت دەستکەوت نییە تا شانازی پێوەکردن نییە،  شانازی ئەوەیە دڵسۆزی خەڵکی خۆتان بن.


وێنە گەورەکە: بە ئامانجی ناساندنی کاندیدانی لیستی 275My پارتی دیموکراتی کوردستان، پارتی کەرنەڤاڵی جەماوەری لە شارەکان دەستپێکردووە و بەردەوام دەبێت تاوەکو وادەی کۆتاییهاتنی بانگەشەی هەڵبژاردن. 
 

پەیامی فەرمی: مەسرور بارزانی، جێگری سەرۆکی پارتی لە بانگەشەی هەڵبژاردنی پارتی ڕایگەیاند: پارتی لەسەر ئاستی هەرێمی کوردستان گەورەترین و کاریگەرترین ‌هێزە و ڕکابەری نییە، هەر بۆیەش ئەم هەڵبژاردنە بۆ ئێمە زۆر گرنگە بۆ ئەوەی بە هێزێکی کاریگەرەوە بچینەوە بەغدا و شەڕی مافی هەموو خەڵکی کوردستانی ستەملێکراو بکەین.

وتیشی، بە بەرگی یاساییەوە ستەم لە هاووڵاتییانی هەرێمی کوردستان کراوە، بەڵام ستەم هەر ستەمە و لە کەس قبووڵکراو نییە و شەڕی ئێمە لە پەرلەمانی عێراق بۆ چەسپاندنی دەستوور دەبێت.

زانیاریی زیاتر: لەبارەی کەرکووک مەسرور بارزانی وتی، کەرکووک خاکێک نییە بتوانین وازی لێبهێنین و هەر دەبێت کەرکووک بگەڕێنینەوە باوەشی خاکی کوردستان. خەباتی پارتی دیموکراتی کوردستان دیارە کە هەمیشە قوربانی بۆ کەرکووک داوە، ئەوانەش دیارن کە ڕێککەوتنیان کردووە بۆ دەستکەوتی شەخسی خۆیان و یارکردن بە چارەنووسی کەرکووک، بۆیە ڕێگە بە پارتی بدەن خزمەتتان بکات. 

مەسرور بارزانی لە وتارەکەیدا ئەمانەشی وت:

٠ جگە لە پارتی و بەبێ پارتی هیچ لایەنێک نییە دەستکەوتی هەبێت، ئەوەی کارێکیشی کردبێت بە هاوبەشی بووە لەگەڵ پارتی.

٠ بەربەست دروستکردن بۆ جێبەجێکردنی کار و پڕۆژەکانی حکومەت و بەربەست دروستکردن بۆ پێکهێنانی حکومەت دەستکەوت نییە تا شانازی پێوەکردن نییە،  شانازی ئەوەیە دڵسۆزی خەڵکی خۆتان بن.

٠ هاووڵاتییانی کەرکووک ڕێگە بە پارتی بدەن خزمەتتان بکات، چۆن کارەبای پڕۆژەی ڕووناکیمان بۆ هاووڵاتییانی کوردستان دابین کردووە و خزمەتگوزاری و ئاسایش و سەقامگیریمان جێگرکردووە، ئەوەش بۆ کەرکووک دەکەین و ئەو شارە دەکەینە نموونەی پێکەوەژیان.

٠ ناوچە دابڕاوەکانی کوردستان دەبێت بگەڕێنەوە باوەشی نیشتمان، نابێت هیچ بستێکی ئەم خاکە لەژێر دەستی داگیرکەر بێت.

٠ ئێمە تەنیا بەرگری لە مافی کورد ناکەین، بەڵکو بەرگری لە مافی هەموو پێکهاتەکانی دیکەش دەکەین، بۆ ئەوەی ڕێڕەوی حکومڕانی ڕاست بکرێتەوە خزمەتی هەموولایەک بکرێت.

٠ شارەکانی عێراق و هاووڵاتییانیان لە سەختترین دۆخی ژیاندان، ئەمەش بەهۆی ئەو جیاوازییە کە لە نێوان هاووڵاتییان دروستکراوە، چونکە ئەو هەموو داهات و سەرمایەی هەیە ناخرێتە خزمەت خەڵکییەوە.

٠ ئێمە دەستوورێکمان نووسی و دەنگمان لەسەریدا بۆ ئەوەی مافی هەموو پێکهاتەکانی تێدا دەستەبەر بکرێت، بەڵام تا ئێستا ماددە دەستوورییەکان پێشیل دەکرێن و جێبەجێ ناکرێن. بۆیە چیتر ڕێگە نادەین عێراق بەرەو دیکتاتۆرییەت و بەرەو مەرکەزییەت بۆ دواوە بگەڕێتەوە.