عێراق سەرۆک باندێکی "زۆر مەترسیدار" ڕادەستی سوید دەکاتەوە

ئاڤا نیوز

ڕۆژی شەممە، وەزارەتی ناوخۆی عێراق ئاشکرای کرد، سەرکردەی باندێکی زۆر مەترسیدار کە بە تاوانی کوشتن و بازرگانیکردن بە ماددە هۆشبەرەکان و بازرگانیکردن بە چەک داواکراوە ڕادەستی سوید کراوەتەوە.

زانیاریی بەدەستهاتوو: پێنجشەممەی ڕابردوو میدیاکانی سووید بڵاویانکردەوە، کەسێک بەناوی 'پویا شەفایی' لەلایەن وەزارەتی ناوخۆی عێراقەوە ڕادەستی سوید کراوەتەوە، کە دەوترێت سەر بە گرووپەکەی ڕەوا مەجیدە، گرووپێکی سویدی کە ڕێبەرەکەی کوردە و ناوی گرووپی فۆکسترۆتە، سەرۆکی تۆڕەکەش لە سوید بە "ڕێوییە كوردەكە ناسراوە".

سەرەتای ئەمساڵیش وەزارەتی دەرەوەی ئەمریکا سزا بە سەر ئەو ڕێکخراوەدا سەپاند، ئەمریکا بە ڕێكخراوێكی مافیایی تاوانكاریی نێودەوڵەتی وەسفی کرد، کە بنكە سەرەكییەكەی لە سویدە و كاری بەقاچاخبردنی ماددەی هۆشبەر دەكات و لە قاچاخی چەكیش تێوەگڵاوە.

لێدوانی فەرمی: ستیڤن هیکتۆر، جێگری بەڕێوەبەری پۆلیسی سوید ڕایگەیاند: سوپاسی عێراق دەکەین بۆ ئەم هاوکارییە، کەسایەتییەکی تاوانکاری کاریگەر ڕادەستی سوید کراوە و ئەمەش کاریگەریی هاوبەشیی نێوان هەردوو وڵاتەکەمان دەردەخات.

پۆلیسی سوید پشتڕاستی کردەوە، ئەم هەنگاوە لە ئەنجامی هاوکارییە ئەمنییەکانی نێوان هەردوو وڵات بووە، ئەمەش دوای سەردانەکەی ئەم دواییەی عەبدولئەمیر شەمەری، وەزیری ناوخۆی عێراق بۆ ستۆکهۆڵم دێت.

ئەمەش بزانە: وەزارەتی ناوخۆی عێراق چەندین یاداشتی هاوکاری و لێکتێگەیشتنی لەگەڵ ژمارەیەک وڵاتی عەرەبی و جیهانی واژۆ کردووە، بەو هۆیەوە چەندین تۆڕی تاوانکاری هەڵوەشێنراوتەوە و کەسانی داواکراوی نێودەوڵەتی ڕادەستی وڵاتەکانیان کراونەتەوە.