ڕێکارەکانی خەرجکردنی مووچەی مانگی هەشت لە بەغدا تەواو کرا

ئاڤا نیوز

 

بەگوێرەی زانیارییەکانی پەیامنێری ئاڤا  لە بەغدا ڕێکارەکانی خەرجکردنی مووچەی مانگی هەشتی مووچەخۆران لە بەغدا تەواو کرا.

 

زانیاریی پەیامنێر؛ سەرچاوەیەک لە وەزارەتی دارایی فیدراڵ بە دەروون مەلا ناجی، پەیامنێری ئاڤای ڕایگەیاند، ڕێکارەکانی جەرجکردنی مووچەی مانگی هەشتی مووچەخۆران لەناو وەزارەتی دارایی عێراق تەواو کران و بەڕێوەبەری گشتیی ژمێرکاری واژۆی لەسەر نووسراوی خەرجکردنی مووچە کردووە و ڕەوانەی بەشی (مەدفوعات) کراوە و لەوێوە دەچێتە بانکی ناوەندیی عێراق.

 

ئەوەی پێشبینی دەکرێت؛ بەگوتەی پەیامنێری ئاڤا ئێستا پرسی مووچە لەنێوان وەزارەتی دارایی فیدراڵ و بانکی ناوەندیی عێراقدایە  و ئەگەر بانکی ناوەندیی پارەی پێویستی لەبەردەستدا بێت هەر ئەمڕۆ کارەکان تەواو دەکرێن و تەمویلی مووچەی مانگی هەشت دەکرێت.

 

لەلایەکی دیکە؛ سەرچاوەیەک لە وەزارەتی دارایی هەرێمی کوردستان بە ئاڤای ڕاگەیاند: لەگەڵ گەیشتنی پارەکە دەست بە دابەشکردنی مووچەی مانگی هەشت دەکەین.

 

باکگراوند؛ ڕۆژی پێنجشەممەی ڕابردوو، ئەنجوومەنی وەزیرانی عێراق وەزارەتی دارایی ڕاسپارد بە خەرجکردنی مووچەی مانگی هەشتی مووچەخۆرانی کوردستان.