لە سنووری شارەوانییەکانی هەولێر 16 هەزار پارچە زەوی دابەش دەکرێن

ئاڤا نیوز

بەڕێوەبەرایەتی گشتیی شارەوانییەکانی هەولێر ئامادەکاریی دەکات بۆ ئەوەی لە سنووری سێ شارەوانی 16 هەزار زەوی دابەش بکات.

وێنە گەورەکە: هەنگاوەکانی ئامادەکردنی و دابەشکردنی زەوی لە سنووری بەڕێوەبەرایەتیی گشتیی شارەوانییەکانی هەولێر خێراتر کراوە، ئامانجەکە ئەوەیە پێش کۆتایی ئەمساڵ سەرجەم سوودمەندبووان لە سنووری هەر 35 قەزا و ناحییەکەی هەولێر تیروپشکی وەرگرتنی زەوییان بۆ بکرێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر؛ بە ئاڤای گوت، "لە قۆناغەکانی کۆتایی ئامادەکردنی زەویین لە سنووری شارەوانییەکانی دارەتوو، بنەسڵاوە و کەسنەزان، دەمانەوێت پێش بەڕێوەچوونی پرۆسەی هەڵبژاردنی پەرلەمانی عێراق، تیروپشک بۆ دابەشکردنیان بکەین."

ئەمەش بزانە: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، تاوەکو ئێستا سەرووی 12 هەزار کەس تیروپشکی وەرگرتنی زەوییان بۆ کراوە.