سزای لە سێدارەدان بۆ چالاکوانێکی ڕۆژهەڵاتی کوردستان دەرچوو

ئاڤا نیوز

کۆماری ئیسلامیی ئێران بە غیابی سزای لەسێدارەدانی بۆ چالاکوانێکی کوردی ڕۆژهەڵاتی کوردستان دەرکرد و شەش هاووڵاتیی دیکەش بە 10 ساڵ بەندکردن سزا دەدات.

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند، کاوەیس عەبدوڵڵازاده، لە لایەن لقی یەکی دادگای شۆڕشی مەهاباد بە سەرۆکایەتیی دادوەر ئەحەد سیامی، سزای سێدارەی بەسەردا سەپێندراوە، هاوکات سالار بایەزیدی ئازەر، خەڵکی مەهاباد، هێمن مام قادری، یوسف مام قادری و مەنسوور کەربەلایی، سالار سەیدڕەحیمی و حەسەن مامیل ئازەر لە لایەن هەمان دادگا هەر یەک سزای 10 ساڵ بەندکردنیان بەسەردا سەپێندراوە.

زانیاریی زیاتر: نەشمیل عابدی لە ڕێکخراوی هەنگاو دەڵێت، ئەو هاووڵاتییانە بە تۆمەتەکانی پێکهێنانی باند و گرووپ بە ئامانجی ڕووخاندنی حکومەت، داڕشتنی پلان بۆ سەرهەڵدانی گشتی و هاوکاری لەگەڵ حزبی دیموکراتی کوردستانی ئێران سزا دراون. هاوکات کاویس عەبدوڵڵاپوور کە یەکێک لەو کەسانەیە، دوای ئازادکردنی بەدانانی بارمتە، لە ئێران ڕۆیشتووەتە دەرەوە.

باکگراوند: ئەو هاووڵاتییانە لە ساڵی 2022 لە لایەن هێزەکانی ئەمنییەکانی کۆماری ئیسلامیی ئێران دەستبەسەر کرا بوون، دوای ماوەیەک بەدانانی بارمتە و بەشێوەی کاتی لە بەندیخانە ئازاد کرابوون. ئێستا هەموویان لە دەرەوەی زیندانن و چاوەڕێن دادگا بانگهێشتیان بکاتەوە.